25 ліпеня, Мінск /Кар. БЕЛТА/. Па выніках стамбульскіх перагавораў ААН павінна выканаць сваю частку пагаднення, якая датычыцца зняцця ўскосных абмежаванняў экспарту збожжа і ўгнаенняў з Расіі. Як паведамляе ТАСС, аб гэтым заявіў прэс-сакратар прэзідэнта РФ Дзмітрый Пяскоў.
Паводле яго слоў, непасрэдных абмежаванняў няма, але існуюць ускосныя. Менавіта гэтыя ўскосныя абмежаванні не даюць ажыццяўляць у поўным аб'ёме адгрузкі, якія так патрэбны для міжнародных рынкаў, асабліва для тых рэгіёнаў, дзе голад пачынаецца асабліва адчувальна. Чыноўнік адзначыў, што за "збожжавым пагадненнем" стаіць вялікая праца, у тым ліку расійскага боку. Аднак, каб даваць ацэнку эфектыўнасці стамбульскіх дамоўленасцей, трэба дачакацца функцыянавання выбудаваных механізмаў.
Прадстаўнік Крамля таксама адзначыў, што ўдар Узброеных Сіл Расіі па ваеннай інфраструктуры марскога порта Адэсы не павінен паўплываць на старт адгрузкі збожжа. Удар выкананы па ваеннай інфраструктуры і ніяк не закранае інфраструктуру, якая выкарыстоўваецца для вывазу збожжа.
Раней паведамлялася, што Расія і ААН у Стамбуле 22 ліпеня 2022 года падпісалі дакументы, прызначаныя садзейнічаць пастаўкам расійскіх сельгаспрадукцыі і ўгнаенняў на сусветныя рынкі. Мемарандум двух бакоў фіксуе, што ААН падключаецца да работы па зняцці антырасійскіх абмежаванняў, якія перашкаджаюць экспарту сельгаспрадукцыі і ўгнаенняў. Яшчэ адзін дакумент апісвае механізм вывазу збожжа з падкантрольных Украіне чарнаморскіх партоў. Пагадненні паміж Расіяй, Турцыяй, Украінай і ААН маюць на ўвазе стварэнне чатырохбаковага каардынацыйнага цэнтра, чые прадстаўнікі будуць даглядаць судны са збожжам, каб не дапусціць кантрабанды зброі і выключыць правакацыі.-0-
