13 лістапада, Мінск /Кар. БЕЛТА/. Венецыя перажывае наступствы адной з самых сур'ёзных паводак у гісторыі. Вечарам 12 лістапада ўзровень вады ў некаторых раёнах горада дасягнуў адзнакі 187 см - гэта самы высокі паказчык з 1966 года, паведамляе італьянская газета La Reppublica.
Удакладняецца, што ў 1966 годзе ў Венецыі быў зафіксаваны максімальны ўзровень пад'ёму вады за ўсю гісторыю метэаназіранняў - 194 см. Прагнозы сіноптыкаў на 13 лістапада несуцяшальныя: чакаецца, што ў асобных раёнах горада ўзровень вады застанецца высокім - да 145 см. Усе школы ў горадзе сёння закрыты, назіраюцца перабоі з тэлефоннай сувяззю і электразабеспячэннем. Паведамляецца аб трох затопленых рачных трамваях.
Паводка закранула большасць асноўных выдатных мясцін Венецыі. У саборы Святога Марка затоплены склеп, і, паколькі вада не адыходзіць, культуролагі апасаюцца больш сур'ёзных пашкоджанняў. У мінулым годзе сабор таксама пацярпеў з-за паводкі. Тады ўзровень вады ў храме дасягаў 90 см, былі значна пашкоджаны тысячагадовая мазаічная падлога, візантыйскія дзверы, мармур і калоны.
З-за паводкі пацярпелі і астравы Венецыянскай лагуны. На Пелестрыне паведамляюць аб двух загінулых, знойдзеных у затопленых дамах. Адзін з загінулых, 78-гадовы мужчына, спрабаваў запусціць электрычныя помпы і атрымаў моцны ўдар токам.
Сіноптыкі прагназуюць на сёння дрэнныя ўмовы надвор'я і ў іншых рэгіёнах Італіі. У прыватнасці, у Даламітавых Альпах чакаюцца моцныя снегапады, у Базілікаце аб'яўлены аранжавы ўзровень небяспекі з-за ліўняў, на ўзбярэжжы Іанічнага мора магчымы штармавыя вятры.-0-