15 студзеня, Мінск /Кар. БЕЛТА/. Галасаванне па падагульняючым пагадненні аб выхадзе Вялікабрытаніі з ЕС пройдзе сёння вечарам у Палаце абшчын брытанскага парламента. Як паведамляе ВВС, гэта падзея можа стаць штуршком да палітычных катаклізмаў у краіне.
Галасаванне па пагадненні павінна было адбыцца яшчэ 11 снежня, аднак прэм'ер-міністр Вялікабрытаніі Тэрэза Мэй яго перанесла, аргументаваўшы тым, што дакумент не падтрымае большасць дэпутатаў. Згодна з прагнозамі экспертаў, станоўчы вынік галасавання па-ранейшаму малаверагодны. Большасць у Палаце абшчын - супраць дагавора аб выхадзе з ЕС, узгодненага ўрадам Вялікабрытаніі і Бруселем. Калі парламент адмовіцца ратыфікаваць дагавор, магчыма любое развіццё падзей, уключаючы варыянты "абвальнага" выхаду без урэгулявання адносін і нават скасаванне Brexit. Любы з варыянтаў будзе мець вялікае значэнне не толькі для брытанскай эканомікі і палітыкі, але і для ўсёй Еўропы.
Абмеркаванне пагаднення аб Brexit у брытанскім парламенце праходзіла на мінулым тыдні і было даволі напружаным.
Так, 7 студзеня група нацыяналістаў, прыхільнікаў выхаду з Еўрасаюза, учыніла дэбош каля сцен парламента. Пад нападкі трапіла дэпутат Анна Субры, якая выступае за другі рэферэндум, гэта значыць фактычна супраць Brexit.
Палата абшчын 8 студзеня прыняла папраўку да закона аб фінансах, забараніўшы казначэйству выдзяляць грошы на падрыхтоўку да "абвальнага" выхаду без санкцыі парламента. Урад заявіў, што на практыцы гэта папраўка асаблівага значэння мець не будзе, але лейбарысты і іх саюзнікі лічаць гэта рашэнне важным сімвалічным крокам. Гэта звязана з тым, што апаненты ўрада апасаюцца, што яна давядзе справу да "абвальнага" Brexit, гэта значыць выхаду з Еўрасаюза без урэгулявання адносін.
9 студзеня Палата абшчын прыняла яшчэ адзін "антыўрадавы" заканадаўчы акт, згодна з якім, калі 15 студзеня праект дагавора з ЕС будзе адхілены, урад на працягу трох дзён павінен будзе прапанаваць Палаце абшчын новы план выхаду з ЕС. Гэта, хутчэй за ўсё, фізічна немагчыма, паколькі аб новым плане трэба дамаўляцца з ЕС, прадстаўнікі якога раней неаднаразова заяўлялі, што пераглядаць праект дагавора не маюць намеру.
10 студзеня лідар апазіцыйнай Лейбарысцкай партыі Джэрэмі Корбін заклікаў Тэрэзу Мэй аб'явіць пазачарговыя выбары, а таксама выказаў меркаванне, што калі 15 студзеня праект дагавора з ЕС будзе правалены, то лейбарысты ініцыіруюць вотум недавер'я ўраду.
Вялікабрытанія павінна выйсці з ЕС 29 сакавіка, пасля чаго настане пераходны перыяд, які прадоўжыцца да канца 2020 года. Калі да 29 сакавіка брытанскія ўлады не прыйдуць да кампрамісу, то Злучанае Каралеўства выйдзе з ЕС без урэгуляваных адносін.-0-
