29 кастрычніка, Мінск /Кар. БЕЛТА/. Ва Украіне поўнасцю знішчана сістэма аховы здароўя. Такое меркаванне ў эфіры тэлеканала "Беларусь 1" выказаў член палітсавета ўкраінскай партыі "Апазіцыйная платформа - За жыццё" Андрэй Лесік.
Эксперт звярнуў увагу на тое, як краіна перажывае чарговую хвалю пандэміі. "Што датычыцца каранавіруса, у нас поўнасцю знішчана сістэма аховы здароўя. Сістэма, якая не была знішчана ў Беларусі, - гэта вынік поспехаў у барацьбе з каранавірусам у Беларусі ў параўнанні з Украінай. У нас няма грошай - і ўсё, лічы, ты не жылец. У нас дэкларатыўна медыцына бясплатная. Цяпер асноўная праблема, каб да цябе наогул хуткая дапамога прыехала, каб яна наогул прыехала і кудысьці цябе адвезла, а везці асабліва няма куды", - расказаў Андрэй Лесік.
Яшчэ адна праблема - ва Украіне ў літаральным сэнсе не хапае кіслароду. У разгар пандэміі, калі бальніцы, якія не ацяпляюцца, перапоўнены цяжкімі пацыентамі, украінскія заводы па вытворчасці медыцынскага кіслароду былі папросту спынены на рэгламентныя тэхнічныя работы. "Украіна ўжо купляе кісларод у Польшчы замест таго, каб мадэрнізаваць і запускаць сваю вытворчасць. Мы проста страцілі час, а цяпер зноў бегаем. Мала таго, што мы не гатовы да барацьбы з каранавірусам, мы не гатовы энергетычна. Мы трапілі ў такую сітуацыю, калі размовы пра энергетычную незалежнасць засталіся проста размовамі", - адзначае эксперт.-0-
