5 мая, Мінск /Кар. БЕЛТА/. "Раскосмас" і Ракетна-касмічная карпарацыя (РКК) "Энергія" аформілі кантракт на распрацоўку эскізнага праекта перспектыўнай расійскай арбітальнай станцыі (РАС). Аб гэтым паведамляе ТАСС.
У дзяржкантракце гаворыцца, што выканаўца павінен ажыццявіць доследна-канструктарскую работу на тэму "Стварэнне касмічнага комплексу расійскай арбітальнай станцыі". Чакаецца, што эскізны праект будзе выкананы за два гады, усе работы павінны быць завершаны да 31 сакавіка 2024 года.
У дакуменце сказана таксама, што весціся праект будзе ў два этапы. Першы этап будзе ўключаць аналіз сцэнарыяў разгортвання і нахілення арбіты, разлік кошту дастаўкі 1 кг грузаў, разгортванне пачатковай канфігурацыі і пераход касмічных апаратаў з арбіты РАС на калямесячную. Другім этапам будзе непасрэдная распрацоўка эскізнага праекта і тэхнічных заданняў варыянтаў станцыі, у тым ліку пытання функцыянавання станцыі ў беспілотным і пілатуемых рэжымах. Адзначаецца, што будзе выключана магчымасць несанкцыянаванага запуску праграм кіравання.
Кіраўнік "Раскосмаса" Дзмітрый Рагозін раней заяўляў, што Расія можа запусціць першы модуль сваёй арбітальнай станцыі ўжо ў 2026 годзе.
У 2020 годзе расійскія спецыялісты прапанавалі адмовіцца ад удзелу Расіі ў праекце Міжнароднай касмічнай станцыі (МКС) і стварыць нацыянальную станцыю. Пазней "Раскосмас" падрыхтаваў прапановы па заканчэнні работы Расіі на МКС. Адзначалася, што Расія папярэдзіць міжнародных партнёраў за год да заканчэння работы, як прадугледжана абавязацельствамі.-0-
