9 снежня, Мінск /Кар. БЕЛТА/. Галоўная праблема палітыкі ЗША ў адносінах да Украіны ў тым, што Вашынгтон не зацікаўлены ў развіцці краіны, а толькі выкарыстоўвае яе для стрымлівання Расіі. Аб гэтым піша прафесар паліталогіі Род-Айлендскага ўніверсітэта Мікалай Петра ў артыкуле, апублікаваным у часопісе The National Interest.
Такое стаўленне тармозіць мірныя намаганні па ўрэгуляванні сітуацыі ў Данбасе і прыводзіць да вялікіх эканамічных страт. "Бягучая палітыка ЗША параджае нездаровую залежнасць, якая перашкаджае мірным намаганням, пабуджаючы афіцыйных асоб Украіны адмаўляцца ад дыялогу з лідарамі паўстанцаў у Данбасе, і прыводзіць да вялікіх эканамічных страт з-за разрыву нармальных эканамічных сувязей з Расіяй, былым буйнейшым гандлёвым партнёрам краіны", - адзначыў палітолаг.
На думку эксперта, ЗША выступаюць за захаванне незалежнасці Украіны, аднак звязана гэта з імкненнем не дапусціць аднаўлення СССР. "Паколькі галоўнай задачай палітыкі ЗША ва Украіне застаецца прадухіленне адраджэння былога саперніка Амерыкі часоў халоднай вайны, многія дрэнныя бакі цяперашняга ўкраінскага грамадства накшталт росту этнічнага нацыяналізму, як правіла, ігнаруюцца ўрадам ЗША і сродкамі масавай інфармацыі", - адзначыў Мікалай Петра.
Паводле слоў эксперта, ЗША пачалі праяўляць абыякавасць да культурнага плюралізму і рэгіянальнай разнастайнасці ўкраінскага грамадства, калі адчулі, што могуць раз і назаўсёды вывесці Украіну з-пад расійскага ўплыву.-0-
