6 лютага, Мінск /Кар. БЕЛТА/. НАТА і Рэспубліка Паўночная Македонія падпісалі пратакол аб уступленні краіны ў альянс, паведамляе Euronews.
Падпісанне дакумента адбылося сёння ў штаб-кватэры НАТА ў Бруселі. Згодна з працэдурай Македонія афіцыйна стане 30-м членам НАТА пасля таго, як пратакол ратыфікуюць усе дзяржавы - члены альянсу, а таксама афіцыйны Скоп'е.
Генсакратар НАТА Енс Столтэнберг паведаміў, што наступны саміт альянсу адбудзецца ў снежні ў Лондане.
Раней паведамлялася, што дзеля ўступлення ў НАТА і ЕС Македонія ўнесла папраўкі ў канстытуцыю аб перайменаванні краіны з Рэспублікі Македонія на Рэспубліку Паўночная Македонія. Такое рашэнне было прадыктавана шматгадовай спрэчкай з Грэцыяй, дзе адна з абласцей таксама мае назву Македонія.-0-
