3 жніўня, Мінск /Кар. БЕЛТА/. У Літве ў палатачным лагеры для мігрантаў на Руднінкайскім палігоне адбыліся беспарадкі, паведамляе Delfi.
Паводле даных МУС Літвы, мігранты ўзбунтаваліся з-за прамоклых палатак. Мужчыны, якія сабраліся каля агароджы лагера, таксама выказалі незадаволенасць у сувязі з умовамі жыцця ў лагеры і патрабавалі, каб іх выпусцілі.
"Еўрасаюз павінен бачыць, што мы жывём тут, як жывёла. Я пакінуў сваю краіну дзеля лепшага жыцця. Але ў мяне на радзіме было значна лепш, чым тут", - заявіў адзін з мігрантаў.
Мігранты крытыкавалі і ежу. Паводле іх слоў, ім даюць ваду дзіўнага колеру, а адзін чалавек напярэдадні атруціўся ежай і чакаў дапамогі ўрачоў шэсць гадзін. "Яны ўсміхаюцца, а я плачу. Дзе правы чалавека?"- заявіў адзін з жыхароў лагера.
Мігранты павесілі над агароджай некалькі плакатаў. На іх - патрабаванне свабоды і забеспячэння правоў чалавека.
У выніку супрацоўнікі Службы грамадскай бяспекі (СГБ) Літвы пачалі разгон мігрантаў, якія сабраліся каля агароджы, з дапамогай вады з брандспойта і слёзатачывага газу. Мігранты, прыкрываючыся адзеннем, крыху адышлі ад агароджы. Пасля гэтага супрацоўнікі СГА адкрылі вароты і вывелі з тэрыторыі двух чалавек. Аднаго адвялі да карэты хуткай дапамогі.
На палігоне Руднінкай у палатачным лагеры плануюць пасяліць 800 мігрантаў. На цяперашні момант тут знаходзіцца 380 чалавек.
Літва з-за ўсё большага патоку мігрантаў аб'явіла экстрэмальную сітуацыю. У гэтым годзе літоўскую граніцу перайшлі амаль 4 тыс. нелегальных мігрантаў. Гэта колькасць у 40 з лішнім разоў перавышае колькасць мігрантаў за ўвесь 2020 год.
Міністр унутраных спраў Літвы Агне Білатайтэ прагназуе, што да канца года ў Літве можа аказацца 10 тыс. нелегальных мігрантаў. "Спачатку мы разлічвалі, што будзе каля 8 тыс. чалавек, якія незаконна прыбываюць у Літву, але цяпер мы бачым, што да канца года гэта колькасць можа быць значна большай - да 10 тыс. У наступным годзе можа быць яшчэ 5 тыс.", - сказала міністр.
У сваю чаргу кіраўнік Дэпартамента міграцыі краіны Эвеліна Гудзінскайтэ паведаміла, што літоўскія пагранічнікі і супрацоўнікі міграцыйных ведамстваў будуць прапаноўваць грошы нелегальным мігрантам, якія жадаюць вярнуцца дадому, каб такім чынам паскорыць іх рэадмісію. Дакладныя сумы, якія будуць прапаноўвацца мігрантам, яшчэ не вядомы. Таксама незразумела, будуць яны выплачвацца з еўрапейскіх або ж з нацыянальных сродкаў.-0-
