27 ліпеня, Мінск /Кар. БЕЛТА/. Тэст на каранавірус са станоўчым вынікам за апошнія суткі здалі як мінімум сем чалавек, якія задзейнічаны ў правядзенні летніх Алімпійскіх гульняў у Токіа. Аб гэтым гаворыцца ў справаздачы, апублікаванай у аўторак на сайце аргкамітэта "Токіа-2020", паведамляе ТАСС.
Паводле даных справаздачы, двое з заражаных - спартсмены, якія пражываюць на тэрыторыі Алімпійскай вёскі. Такім чынам, агульная колькасць выпадкаў заражэння каранавірусам сярод задзейнічаных у правядзенні Гульняў дасягнула 160.
Як паведамляе японскае агенцтва Дзідзі, атлетамі, якія заразіліся, сталі два тэнісісты са зборнай Нідэрландаў.
У Токіа з 12 ліпеня дзейнічае рэжым надзвычайнай сітуацыі з-за пагаршэння эпідэміялагічнай абстаноўкі ў сталічнай прэфектуры. Рэжым надзвычайнай сітуацыі прадугледжвае, у прыватнасці, забарону на продаж алкаголю ва ўстановах грамадскага харчавання і абмежаванне на допуск гледачоў на масавыя мерапрыемствы. Па гэтай прычыне Алімпіяда ў сталіцы Японіі праходзіць без гледачоў з 23 ліпеня па 8 жніўня.-0-
