17 студзеня, Масква /Эдуард Півавар – БЕЛТА/. Узмацненне сіл НАТА каля граніц Саюзнай дзяржавы мае правакацыйны характар. Аб гэтым заявіла на брыфінгу афіцыйны прадстаўнік МЗС Расіі Марыя Захарава, каменціруючы планы Польшчы размясціць на сваёй тэрыторыі нямецкія войскі, перадае карэспандэнт БЕЛТА.
Такія планы Марыя Захарава назвала чарговым элементам глабальнага русафобскага курсу краін НАТА і канкрэтна Польшчы. Яна нагадала, што на тэрыторыі Польшчы ўжо дыслацыравана каля 10 тыс. амерыканскіх ваенных, там жа знаходзіцца шматнацыянальная тактычная групоўка НАТА, у якую ўваходзяць ваеннаслужачыя ЗША, Брытаніі, Румыніі і Харватыі.
"Відавочна, што заклікі да размяшчэння на польскай тэрыторыі дадатковых замежных войскаў, у якіх няма ніякай неабходнасці, калі гэтыя краіны арыентаваны на мір, трэба разглядаць як імкненне павысіць яшчэ больш узровень напружанасці ў Еўропе, прадоўжыць сітуацыю глабальнага краху агульнаеўрапейскай бяспекі", - сказала Марыя Захарава. Пры гэтым яна не выключыла, што такія крокі робяцца, каб падліць масла ў агонь.
Таксама афіцыйны прадстаўнік МЗС РФ звярнула ўвагу, што ў снежні 2023 года паміж Германіяй і Літвой было падпісана пагадненне аб павелічэнні ваеннай прысутнасці Бундэсвера на літоўскай тэрыторыі да ўзроўню брыгады. "Відаць, польскім кіраўнікам не хочацца адставаць ад сваіх суседзяў у дэманстрацыі лаяльнасці старэйшым братам з Берліна, Бруселя і Вашынгтона", - адзначыла яна.
"Я хацела б яшчэ раз падкрэсліць, што ўзмацненне актыўнасці і ваенных патэнцыялаў НАТА, яе краін-членаў паблізу граніц Саюзнай дзяржавы Расіі і Беларусі мае правакацыйны характар, вядзе да поўнай дэградацыі архітэктуры еўрапейскай бяспекі. І такія крокі, вядома, не застануцца без адпаведнай рэакцыі з расійскага боку", - заявіла афіцыйны прадстаўнік МЗС РФ.
"Цікава, ці плануе кіраўніцтва Польшчы дабівацца кампенсацыі расходаў на ўтрыманне кантынгентаў ФРГ у рамках фінансавых патрабаванняў, якія Варшава прад'яўляе немцам за акупацыю ў час Другой сусветнай вайны?" - дадала Марыя Захарава.-0-
