12 сакавіка, Мінск /Кар. БЕЛТА/. Прапановы Расіі па гарантыях бяспекі, накіраваныя ЗША і НАТА, ужо не ў сіле, паколькі поўнасцю змянілася канфігурацыя сітуацыі. Аб гэтым заявіў намеснік кіраўніка МЗС РФ Сяргей Рабкоў у эфіры Першага канала, паведамляе ТАСС.
"Усё ж поўнасцю змянілася канфігурацыя, цяпер сітуацыя радыкальна іншая. І пытанне ў тым, каб забяспечыць дасягненне тых мэт, якія пастаўлены нашым кіраўніцтвам перад спецыяльнай ваеннай аперацыяй", - адзначыў намеснік міністра.
Паводле яго слоў, кантакты Расіі з прадстаўнікамі ЗША прадаўжаюцца ў пастаянным рэжыме, у тым ліку па лініі расійскага пасольства ў Вашынгтоне. "Хацеў бы адзначыць, што кантакты з амерыканскімі прадстаўнікамі не спыняюцца, яны прадаўжаюцца ў пастаянным рэжыме. Пасольства функцыянуе, ёсць кантакты па іншых лініях", - сказаў ён.
Сяргей Рабкоў адзначыў, што Масква зможа і настроена аднавіць дыялог па стратэгічнай стабільнасці з ЗША, пашырэнне ўзаемадзеяння на гэтым трэку залежыць ад пазіцыі Вашынгтона.
Таксама намеснік кіраўніка МЗС РФ назваў заявы прэзідэнта ЗША аб трэцяй сусветнай вайне "спробамі сыграць на нервах". "Я звяртаю ўвагу на тое, што мы не робім ніякіх захадаў, вербальных, у выглядзе заяў і чаго б там ні было яшчэ, што можна было б расцаніць як эскалацыю. Такога няма. Між тым вышэйшая службовая асоба ЗША адкрыта гаворыць аб небяспецы трэцяй сусветнай вайны. Гэта спроба сыграць на нервах, навязаць свой парадак дня ўсёй міжнароднай супольнасці. Для нас відавочны дэструктыўныя мэты гэтай лініі", - сказаў намеснік міністра.
Акрамя таго, Сяргей Рабкоў заявіў, што санкцыі Захаду не звязаны са спецыяльнай ваеннай аперацыяй, яны знайшлі б іншыя прычыны ўвасобіць свае санкцыйныя планы. У той жа час ужо гатовы і хутка будуць абнародаваны расійскія санкцыйныя спісы адносна ЗША.-0-
