ДЗЯРЖОРГАНЫДЗЯРЖОРГАНЫ
Флаг Панядзелак, 17 студзеня 2022
Мінск -6°C
Усе навіны
Усе навіны
У свеце
17 лістапада 2021, 15:24

"Мы хутка забываем, што таксама былі нелегаламі". Неабыякавыя палякі збіраюць дапамогу для бежанцаў

17 лістапада, Мінск /Кар. БЕЛТА/. У польскім горадзе Семятычы неабыякавыя жыхары збіраюць гуманітарную дапамогу для бежанцаў, якія знаходзяцца на граніцы Польшчы і Беларусі. Збор арганізавала рэдакцыя мясцовай газеты. З-за рэжыму ЧП, уведзенага польскімі ўладамі, журналісты і супрацоўнікі гуманітарных арганізацый не могуць аказваць дапамогу бежанцам у прыгранічных раёнах. Пра жаданне дапамагчы людзям, страх аказаць такую дапамогу і быць асуджанымі ў інтэрв'ю Gazeta Wyborcza расказала мясцовая журналістка Ганна Кандрачук.

Паводле слоў Ганны Кандрачук, у рэдакцыю газеты людзі пастаянна прыносяць пасылкі з рэчамі для мігрантаў. "Пачалося з адзення. Мы заўважылі, што першапачаткова людзі наводзілі парадак у шафах. Валанцёрам давялося рассартаваць гэта адзенне. Але хутка сталі паступаць якасныя новыя рэчы. Мы атрымліваем пасылкі з усёй Польшчы - з Кракава, Кельцы, Скшышува і Варшавы. Адзенне, абутак, спальнікі, ежа, матрацы, тэрмасы, абагравальнікі, запалкі... Як сказаў адзін з дабрачынцаў - прадметы выжывання", - расказвае Ганна Кандрачук.

Паводле яе слоў, многія жыхары Семятычы ў свой час нелегальна шукалі работу за мяжой. "Жыхары Семятычы і навакольнай мясцовасці маюць трывалыя сувязі з Бельгіяй. Тут у кожнай сям'і ёсць хтосьці, хто працаваў у Бельгіі або да гэтага часу там жыве. Многія выехалі ў Брусель да таго, як Польшча ўступіла ў Еўрасаюз, калі яшчэ нельга было працаваць там легальна. Мы таксама знаходзіліся там нелегальна, але нас адвезлі не ў лес, а ў аэрапорт у Завентэме (міжнародны аэрапорт недалёка ад Бруселя) і адправілі назад у Польшчу", - нагадала журналіст.

Яна адзначыла, што аб гэтым хутка забываюць. Сёння далёка не ўсе лічаць, што мігрантаў трэба пускаць у Польшчу. "Пасля нашых публікацый у рэдакцыю прыйшла жанчына і сказала, што мігранты павінны ісці да пункта пропуску, перасякаць граніцу на законных падставах. Так ужо атрымалася, што яе сын нелегальна трапіў у ЗША праз Мексіку. Калі я нагадала ёй аб гэтым, яна пацвердзіла, што ўсё так і было. На наступны дзень яна прыехала з коўдрай для мігрантаў", - расказала Ганна Кандрачук.

У мясцовых жыхароў ёсць апасенні адносна мігрантаў. Паводле слоў журналісткі, апошнім часам людзі баяліся адкрываць хлявы, апасаючыся, што там знойдуць мігрантаў. "Але на самай справе ні з кім нічога дрэннага не здарылася. Ніхто ні на каго не нападаў. А як паказваюць апошнія падзеі - усё наадварот: біццё і аграбленне мігрантаў пад Хайнуўкай, знішчэнне машын медыкаў на граніцы", - пералічыла Ганна Кандрачук.

Яна адзначыла, што сапраўды паступалі навіны, што хтосьці пражываў у пустуючых дамах. Але ў выніку нічога не было сапсавана або ўкрадзена, відавочна, што бежанцы проста шукалі магчымасць пераначаваць.

Ганна Кандрачук таксама расказала гісторыю, як у камуне Мілейчыцэ жанчына запрасіла бежанцаў да сябе дадому. Але нейкі "дружалюбны" сусед паведаміў службам, і праз некалькі мінут прыехалі пагранічнікі.

У сувязі з гэтым нават тыя людзі, якія хочуць дапамагчы бежанцам, адчуваюць страх. "Людзі апасаюцца, што дапамога або любая рэакцыя могуць быць расцэнены як саўдзел у незаконным перасячэнні граніцы. Нават тыя, хто прыносіць у рэдакцыю рэчы, у большасці хочуць быць ананімнымі", - сказала Ганна Кандрачук.

У сувязі з гэтым журналістка адзначае, што аказанне дапамогі людзям законнае. "Я не ўнікаю ў палітычныя пытанні, але шкадую тых людзей, якія апынуліся на граніцы", - рэзюмавала Ганна Кандрачук.

Як паведамілі ў Дзяржпагранкамітэце Беларусі, амаль 2 тыс. бежанцаў прадаўжаюць знаходзіцца паблізу беларуска-польскай граніцы. У мінулую ноч частка з іх засталася на тэрыторыі, прылеглай да пункта пропуску, частка - у стыхійным лагеры ў лесе. Амаль 1 тыс. чалавек, якія найбольш пацярпелі ад дзеянняў польскіх сілавікоў, а таксама жанчыны і дзеці ўпершыню за апошнія 9 сутак пераначавалі ў адносна прымальных умовах - у транспартна-лагістычным цэнтры недалёка ад граніцы. Людзей напярэдадні вечарам аглядалі медыкі, па дапамогу на працягу ночы звярнуліся 4 чалавекі.

Беларускі бок забяспечыў бежанцаў гарачым харчаваннем як у лагістычным цэнтры, так і ў лагеры паблізу граніцы ў цёплых палатках. Сіламі ўлад, грамадскіх арганізацый рэгулярна падвозілася вада, цёплыя рэчы, сродкі гігіены і аказвалася іншая гуманітарная дапамога. Людзям, якія прынялі рашэнне начаваць на вуліцы, неаднаразова прапаноўвалася перайсці ў лагістычны цэнтр. Раніцай 17 лістапада прынята рашэнне аб размяшчэнні часткі іншаземцаў у іншых месцах.-0-

Падпісвайцеся на нас у
Twitter
Топ-навіны
З НАМІ НАЙБОЛЬШ ЦІКАВА
Свежыя навіны Беларусі