26 студзеня, Мінск /Кар. БЕЛТА/. Распаўсюджванне амікрон-штама каранавіруса, рост цэн на энерганосьбіты, спад у сектары нерухомай маёмасці Кітая і больш павольнае, чым чакалася, аднаўленне прыватнага спажывання абмяжоўваюць перспектывы глабальнага эканамічнага росту. Аб гэтым гаворыцца ў студзеньскім дакладзе Міжнароднага валютнага фонду, паведамляе Euronews.
У дакладзе МВФ перагледзеў прагнозы па росце сусветнай эканомікі ў бок паніжэння. Так, згодна з новымі ацэнкамі, у бягучым годзе тэмпы росту сусветнага ВУП складуць 4,4 працэнта, у кастрычніцкім прагнозе гэты паказчык складаў 4,9 працэнта. У краінах еўразоны ВУП прыбавіць 3,9 працэнта.
"У пачатку трэцяга года пандэміі колькасць загінулых павялічылася да 5,5 млн, а спадарожныя эканамічныя страты, як чакаецца, да канца 2024 года складуць каля $13,8 трлн", - заявіла першы намеснік дырэктара-распарадчыка МВФ Гіта Гапінат.
У МВФ таксама звярнулі ўвагу на магчымасць з'яўлення глабальных рызык, паколькі геапалітычная напружанасць застаецца высокай, а надзвычайная сітуацыя ў сферы клімату азначае, што верагоднасць буйных стыхійных бедстваў застаецца павышанай.-0-