6 жніўня, Мінск /Кар. БЕЛТА/. Моцныя ліўні абрушыліся на паўднёвыя рэгіёны Польшчы, затоплены больш за 700 дамоў, паведамляе польскае інфармацыйнае агенцтва PAP.
Значны ўрон нанесены рэгіёну Малая Польшча. Мясцовыя ўлады паведамілі, што з-за разліву рэк пачаліся паводкі. Затоплена больш за 100 участкаў мясцовых і абласных дарог. Часова былі прыпынены чыгуначныя зносіны паміж Кракавам і Закапанэ.
У работах па ўстараненні наступстваў стыхіі прымаюць удзел больш за 5,6 тыс. супрацоўнікаў пажарных і дарожных службаў. Даных аб пацярпелых пакуль не паступала.
Між тым сіноптыкі прагназуюць, што дажджы на поўдні, усходзе і ў цэнтральнай частцы Польшчы прадоўжацца ў бліжэйшы час. Для некаторых раёнаў аб'яўлены найвышэйшы, трэці, узровень метэаралагічнай небяспекі.-0-
