13 студзеня, Мінск /Кар. БЕЛТА/. У ста раёнах Тайланда зафіксавалі моцнае забруджванне паветра. Дапушчальны ўзровень перавышаны ў некалькі разоў. Аб гэтым са спасылкай на даныя маніторынгу World's Air Pollution паведамляе ТАСС.
Так, у 10 раёнах каралеўства індэкс якасці паветра павысіўся да фіялетавага ўзроўню, што лічыцца вельмі нездаровым. Пры норме 50 пунктаў ён склаў ад 203 да 282. Спецыялісты папярэдзілі аб магчымым негатыўным уплыве на здароўе. Напрыклад, дзецям і людзям з рэспіраторнымі захворваннямі, уключаючы астму, неабходна абмежаваць час знаходжання на адкрытым паветры. А ў іншых 90 абласцях індэкс павышаны да чырвонага ўзроўню (нездаровы), склаўшы ад 151 да 194 пунктаў.
Паводле даных World's Air Pollution на раніцу 13 студзеня, краіна знаходзіцца на восьмым месцы ў пераліку дзяржаў з самай нізкай якасцю паветра. Тайланду папярэднічаюць у гэтым рэйтынгу Кітай, Катар, Бангладэш, Буркіна-Фасо, Індыя, ЦАР і Пакістан.
Як паведамляецца, традыцыйна на снежань-красавік прыпадае пік забруджвання паветра ў Бангкоку і суседніх правінцыях. Звычайна ў гэты перыяд няма ветру, шкодныя выкіды затрымліваюцца ў атмасферы.-0-
