6 красавіка, Мінск /Кар. БЕЛТА/. Штогадовая Міжнародная канферэнцыя працы перанесена з чэрвеня 2020 года на чэрвень 2021-га ў сувязі з распаўсюджваннем каранавіруса. Аб гэтым паведамляецца на сайце Міжнароднай арганізацыі працы (МАП).
"Рашэнне прынята ў сувязі з сур'ёзнымі абмежаваннямі ў паездках у свеце ў выніку пандэміі", - гаворыцца ў паведамленні. Удакладняецца, што 338-я і 339-я сесіі Адміністрацыйнага савета МАП таксама не адбудуцца.
Міжнародная канферэнцыя працы - вышэйшы орган МАП - збіраецца раз у год у Жэневе, каб абмеркаваць ключавыя праблемы працы, распрацаваць і прыняць міжнародныя працоўныя нормы і пракантраляваць іх выкананне. Форум аб'ядноўвае прадстаўнікоў урадаў, работнікаў і работадаўцаў з 187 дзяржаў - членаў МАП. 109-я Міжнародная канферэнцыя працы павінна была праходзіць з 25 мая па 5 чэрвеня 2020 года.-0-
