17 студзеня, Мінск /Кар. БЕЛТА/. Прэм'ер-міністр Вялікабрытаніі Тэрэза Мэй заклікала да аб'яднання ўсе палітычныя сілы краіны для рэалізацыі Brexit. Аб гэтым яна заявіла перад уваходам у сваю лонданскую рэзідэнцыю пасля таго, як увечары 16 студзеня захавала за свабой прэм'ерскую пасаду, здолеўшы пераадолець вотум недаверу свайму ўраду, паведамляе ТАСС.
"Нам неабходна канструктыўна працаваць разам над тым, каб выкласці тое, чаго хоча парламент. Таму я запрашаю членаў парламента з усіх партый аб'яднаць намаганні для руху наперад", - сказала Тэрэза Мэй.
Паводле слоў кіраўніка брытанскага ўрада, пераважная большасць брытанцаў лічыць неабходным, каб урад рэалізаваў Brexit, нягледзячы на тое, што дэпутаты Палаты абшчын адхілілі 15 студзеня пагадненне паміж Лонданам і Бруселем. "Здзелка з Еўрасаюзам, над заключэннем якой я працавала, была адхілена парламентарыямі з вялікай розніцай у колькасці галасоў. Я лічу сваім абавязкам выканаць распараджэнне брытанскага народа аб тым, каб пакінуць ЕС. І я маю намер гэта зрабіць", - падкрэсліла Тэрэза Мэй.
Брытанскі прэм'ер паведаміла, што правяла ўжо ўвечары 16 студзеня кансультацыі з лідарам партыі "Ліберальныя дэмакраты" Вінсам Кейблам і лідарамі парламенцкіх фракцый Шатландскай нацыянальнай партыі Іэнам Блэкфардам і "Плайд камры" - Партыі Уэльса Ліз Сэвіл-Робертс. Пачынаючы з 17 студзеня, паводле слоў Тэрэзы Мэй, будуць праходзіць сустрэчы высокапастаўленых прадстаўнікоў брытанскага ўрада, уключаючы яе саму, з максімальна шырокім колам палітычных сіл, уключаючы Дэмакратычную юніянісцкую партыю (ДЮП), з якой торы заключылі палітычны саюз пасля апошніх усеагульных выбараў. "Я расчаравана тым, што лідар Лейбарысцкай партыі Джэрэмі Корбін пакуль не прыняў рашэння аб удзеле, але нашы дзверы застаюцца адкрытымі", - заўважыла кіраўнік урада. Яна таксама сказала, што цяпер абавязкам палітычных сіл краіны з'яўляецца дасягненне кансэнсусу ў рэалізацыі на практыцы вынікаў рэферэндуму аб Brexit, што адбыўся ў 2016 годзе.
Тэрэза Мэй захавала за сабой пасаду прэм'ер-міністра Вялікабрытаніі пасля таго, як здолела пераадолець вотум недаверу свайму ўраду. З такой ініцыятывай - першай за апошнія чвэрць стагоддзя - выступіў лідар апазіцыйнай Лейбарысцкай партыі Джэрэмі Корбін. Ён абвінаваціў камбін у няздольнасці дабіцца выгаднай для краіны здзелкі з Еўрасаюзам па ўмовах выхаду Вялікабрытаніі са складу супольніцтва пасля таго, як парламент адхіліў урадавае пагадненне з уладамі ЕС аб умовах Brexit рэкорднай у брытанскай гісторыі большасцю - колькасцю 230 галасоў.-0-
