15 красавіка, Мінск /Кар. БЕЛТА/. Міжнародны тэрарызм застаецца адной з асноўных праблем у сферы забеспячэння бяспекі, заявіла старшыня Савета Федэрацыі Федэральнага сходу Расіі Валянціна Мацвіенка на палях міжнароднай парламенцкай канферэнцыі "Глабальныя выклікі і пагрозы ва ўмовах пандэміі COVID-19. Тэрарызм і насільны экстрэмізм". Форум арганізаваны ў рэжыме відэа-канферэнц-сувязі Міжпарламенцкай асамблеяй дзяржаў - удзельніц Садружнасці Незалежных Дзяржаў сумесна з парламенцкімі асамблеямі АБСЕ, Савета Еўропы, Міжземнамор'я і Контртэрарыстычным упраўленнем ААН, перадае карэспандэнт БЕЛТА.
"Міжнародны тэрарызм, на жаль, сёння застаецца адной з асноўных праблем у сферы забеспячэння бяспекі. Пандэмія каранавіруснай інфекцыі, якая выбухнула год таму, стала новым фактарам, які яшчэ больш ускладніў задачу процідзеяння тэрарыстычнай пагрозе. У гэтых няпростых умовах асабліва актуальнай становіцца задача ўсебаковага ўмацавання міжнародных механізмаў супрацоўніцтва, павышэння іх аператыўнасці і эфектыўнасці, удасканалення заканадаўчага забеспячэння бяспекі ў глабальным маштабе", - сказала Валянціна Мацвіенка.
Паводле яе слоў, гэта не першая сустрэча па антытэрарыстычнай тэматыцы. "Цяперашняя канферэнцыя - лагічны працяг мерапрыемстваў, якія мы праводзілі ў 2017 і 2019 гады. І сёння я рада зноў вітаць у ліку яе суарганізатараў нашых традыцыйных партнёраў, - адзначыла старшыня Савета Федэрацыі. - Пандэмія аказала ўплыў не толькі на асаблівасці антытэрарыстычнай работы, але і на фармат нашай канферэнцыі, якая праходзіць па відэа-канферэнц-сувязі. Але я ўпэўнена, што гэта ні ў якай меры не паўплывае на эфектыўнасць і выніковасць нашай работы".
Удзел у канферэнцыі прымае парламенцкая дэлегацыя Беларусі на чале са старшынёй Савета Рэспублікі Наталляй Качанавай.
У час канферэнцыі праходзяць пасяджэнні тэматычных сесій па пытаннях прававых механізмаў міжнароднага супрацоўніцтва ў процідзеянні тэрарызму і насільнаму экстрэмізму; ацэнцы тэрарыстычнай пагрозы і намаганняў па прадухіленні насільнага экстрэмізму; заахвочванні і абароне правоў ахвяр тэрарызму і задаволенні іх патрэбнасцей; дэмакратыі перад тварам пандэміі COVID-19.-0-
