Сцяг Аўторак, 19 сакавіка 2024
Усе навіны
Усе навіны
У свеце
04 кастрычніка 2022, 11:30

"Літоўскія ўлады прызнаваць сваіх памылак не хочуць". Шчокін аб Ігналінскай АЭС

4 кастрычніка, Мінск /Кар. БЕЛТА/. Ігналінская АЭС - міна запаволенага дзеяння, заявіў карэспандэнту БЕЛТА загадчык аддзела сацыялогіі дзяржаўнага кіравання Інстытута сацыялогіі Нацыянальнай акадэміі навук Мікалай Шчокін.

"Апошнім часам у свеце востра паўстала пытанне энергетычнай бяспекі. Дарэчы кажучы, на постсавецкай прасторы шэраг былых савецкіх рэспублік, Літва, Украіна, на жаль, да пакінутай атамнай спадчыны паставіліся як мінімум безадказна або змаладушнічалі. Так, адной з умоў уваходжання Літвы ў Еўрапейскі саюз было закрыццё Ігналінскай АЭС, на якой у свой час пры праектаванні і будаўніцтве былі прыменены перадавыя тэхналогіі. Аддаўшы пад казырок брусельскай бюракратыі, літоўскія кіраўнікі пазбавілі свой народ будучыні. Дарэчы, аб гэтым яшчэ ў 1990-я гады папярэджваў Аляксандр Лукашэнка і асабліва акцэнтаваў увагу на бяспецы", - расказаў Мікалай Шчокін.

Словы Прэзідэнта Беларусі сталі прарочымі, канстатаваў палітолаг. "Халатнае стаўленне да эксплуатацыі Ігналінскай АЭС ужо не раз прыводзіла да тэхнічных збояў, якія могуць літаральна ўзарваць усю Еўропу. Так, МАГАТЭ зафіксавала факт выхаду адпрацаванага ядзернага паліва ў атмасферу. Пры гэтым літоўскія ўлады прызнаваць сваіх памылак не хочуць. Больш таго, на сайце станцыі расказваецца аб нейкіх міфічных поспехах. Трэба прызнаць, Беларусь, як і ўся Еўропа, цяпер на парахавой бочцы. У гэтым кантэксце ёсць праблема наяўнасці вялікай колькасці радыеактыўнага графіту і яго ўтылізацыя, якая ідзе ў парушэнне ўсіх тэхналагічных патрабаванняў. Сапраўды, тэхналогіі ўтылізацыі ў свеце адсутнічаюць. Але бяздумна дэманціраваць графітавыя карпусы, ператвараючы іх у парашок, - прамы шлях да катастрофы", - адзначыў ён.

"Аднак самае страшнае тое, што дакладнага плана разбору Ігналінскай станцыі няма. Некаторыя дэталі і паліва вывезуць. А вось на многія іншыя аперацыі дэмантажу і абясшкоджванне тэрыторыі грошай няма. Атрымліваецца, астатняе кінуць, што стане мінай запаволенага дзеяння і рэальнай пагрозай, у тым ліку і для Беларусі. Лічу неабходным гэта пытанне ўзняць ва ўсіх зацікаўленых сусветных арганізацыях. Думаю, зварот грамадзянскай супольнасці, дэпутатаў да сусветнай супольнасці з мэтай прыцягнуць увагу з пералічэннем усіх шматлікіх парушэнняў літоўскім бокам дагавораў аб атамнай бяспецы і вырашыць сур'ёзную праблему з Ігналінскай АЭС з'яўляецца грамадзянскім абавязкам, - падкрэсліў Мікалай Шчокін. - Трэба сказаць, што пры будаўніцтве БелАЭС з боку Літвы шмат было выліта бруду на нашу краіну і хлусні асабіста на кіраўніка дзяржавы. Хоць Беларуская АЭС адна з самых сучасных і бяспечных станцый. Беларусь пры планаванні, праектаванні і будаўніцтве АЭС была адкрытай і нічога не ўтойвала. Менавіта гэта і само будаўніцтва БелАЭС выклікала зайздрасць і агрэсію з боку як Літвы, так і Польшчы і ўсяго калектыўнага Захаду, якія ў з'яўленні АЭС убачылі сур'ёзную канкурэнцыю".-0-

Падпісвайцеся на нас у
Twitter
Топ-навіны
Свежыя навіны Беларусі