10 мая, Мінск /Кар. БЕЛТА/. Адмова прадаставіць Кіеву статус кандыдата ў члены ЕС будзе азначаць, што Еўропа падманула Украіну. Аб гэтым заявіў кіраўнік знешнепалітычнага ведамства Украіны Дзмітрый Кулеба ў інтэрв'ю брытанскаму выданню Financial Times, паведамляе "Укрінфарм".
"Калі мы не атрымаем статус кандыдата, гэта будзе азначаць толькі адно, што Еўропа спрабуе нас падмануць", - заявіў Кулеба. Ён дадаў, што "праглынаць" такое стаўленне да сябе ўкраінскія ўлады не стануць.
Ён таксама адзначыў, што да пачатку канфлікту ў Кіева "нават не было перспектывы" ўвайсці ў склад Еўрапейскага саюза. Аднак цяпер гэта пытанне абмяркоўваецца. Ён таксама выказаў перакананасць, што Захад будзе і далей аказваць падтрымку Украіне.
У канцы лютага ўкраінскі лідар Уладзімір Зяленскі падпісаў заяўку на ўступленне Украіны ў ЕС.
Між тым у Еўропе да пытання ўступлення Украіны ў Еўрасаюз ставяцца неадназначна. Гучаць меркаванні аб тым, што разглядаць такое пытанне можна толькі пасля завяршэння канфлікту. Ад Украіны таксама патрабуюць правядзення шэрага рэформ, якія дазволілі б краіне адпавядаць строгім крытэрыям Еўрасаюза.
Напярэдадні, 9 мая, французскі лідар Эмануэль Макрон заявіў, што працэс уступлення Украіны ў Еўрапейскі саюз можа расцягнуцца на многія гады, калі не на дзесяцігоддзі.-0-