17 лютага, Мінск /Кар. БЕЛТА/. Колькасць захварэлых на каранавірус у свеце з 8 па 15 лютага ў параўнанні з папярэднім тыднем знізілася на 16 працэнтаў, а смяротных канцоў - на 10 працэнтаў. Гэтыя даныя прыведзены ў апублікаваным у Жэневе штотыднёвым эпідэміялагічным бюлетэні Сусветнай арганізацыі аховы здароўя (СААЗ), паведамляе Deutsche Welle.
Найбольшая колькасць новых выпадкаў заражэння прыпала на ЗША - больш як 673 тыс. Далей ідуць Бразілія (больш за 318 тыс.), Францыя (больш за 127 тыс.), Расія (больш за 104 тыс.), Вялікабрытанія (больш за 97 тыс.), Італія (больш за 85 тыс.), Індыя (больш за 78 тыс.), Мексіка (больш за 66 тыс.), Інданезія (больш за 63 тыс.), Турцыя (больш за 55 тыс.).
Усяго з пачатку пандэміі каранавірусам у свеце заразіліся больш як 108,8 млн чалавек, 2,4 млн памерлі.
Між тым прадстаўнік СААЗ у Расіі Меліта Вуйновіч у эфіры "Расіі 1" заявіла, што калі людзі не будуць выконваць меры засцярогі, магчыма трэцяя хваля пандэміі COVID-19. Гэта звязана з тым, што чалавецтва яшчэ не выпрацавала дастатковы калектыўны імунітэт супраць каранавіруса.-0-
