10 лістапада, Фрытаўн /БЕЛТА - СІНЬХУА/. Колькасць загінулых ад выбуху бензавоза ў Сьера-Леонэ ўзрасла да 130.
Адзначаецца, што для ідэнтыфікацыі ахвяр выбуху выкарыстоўваюцца ДНК-тэсты. Паводле даных Міністэрства аховы здароўя краіны, 29 пацярпелых усё яшчэ ў бальніцы. "Нам патрэбна шмат донарскай крыві, каб выратаваць жыцці тых, хто моцна абгарэў", - заявіў міністр аховы здароўя Сьера-Леонэ Осцін Дэмбі. Паводле яго слоў, урад супрацоўнічае з дабрачыннымі і медыцынскімі арганізацыямі, каб атрымаць як мага больш крыві для пералівання пацярпелым.
Як паведамлялася, 5 лістапада ў сталіцы Сьера-Леонэ Фрытаўне бензавоз з поўнай паліўнай цыстэрнай трапіў у аварыю. Ён сутыкнуўся з грузавіком, які перавозіў гранітныя пліты. Людзі сабраліся вакол бензавоза, спрабуючы сабраць паліва, якое вылівалася. У гэты момант яно загарэлася і ўзарвалася.-0-
