15 снежня, Мінск /Кар. БЕЛТА/. Колькасць дзяцей, шпіталізаваных пасля атручэння ў школе-інтэрнаце "Тувінскі кадэцкі корпус", павялічылася да 103, паведамляе ТАСС са спасылкай на Міністэрства аховы здароўя Тувы.
"103 дзіцяці (у бальніцы. - Заўвага ТАСС). Стан са станоўчай дынамікай", - сказаў субяседнік агенцтва.
У ноч на 14 снежня медыкі шпіталізавалі 74 дзіцяці з прыкметамі харчовага атручэння са школы-інтэрната. Паведамлялася, што ўсяго недамаганне адчулі 79 выхаванцаў корпуса. Следчыя паліцыі ўзбудзілі крымінальную справу пасля масавага атручэння па ч.1 арт.236 (парушэнне санітарна-эпідэміялагічных правіл, што прывяло па неасцярожнасці да масавага захворвання або атручэння людзей альбо стварыла пагрозу такіх наступстваў) КК РФ.
Паводле даных Расспажыўнагляду, па выніках першых праверак былі выяўлены грубыя парушэнні працэсу прыгатавання ежы і санітарных правіл пры арганізацыі харчавання выхаванцаў школы-інтэрната. Устаноўлена, што пастаўкай прадуктаў ва ўстанову займаецца індывідуальны прадпрымальнік, дагавор з якім заключаны ў верасні. Пры праверцы ІП не змог прадставіць адпаведныя дакументы на пастаўленую прадукцыю, якія сведчаць аб яе належнай якасці. Адукацыйная ўстанова закрыта на каранцін. Вучэбны працэс не спынены, яго выбудоўваюць у дыстанцыйным рэжыме.-0-
