22 верасня, Мінск /Кар. БЕЛТА/. Колькасць пацярпелых у выніку стральбы ў Пермскім дзяржаўным нацыянальным даследчым універсітэце павялічылася да 43 чалавек, паведамляе ТАСС.
У цяжкім стане знаходзіцца толькі стралок, якому ампутавалі галёнку, расказала міністр аховы здароўя Пермскага края Настасся Круцень на пасяджэнні рэгіянальнага ўрада.
"На сённяшні дзень 43 пацярпелыя. З іх 12 чалавек знаходзяцца ў трох стацыянарах Пермі. Цяжкі толькі адзін - гэта стралок, учора вечарам была праведзена ампутацыя галёнкі. Стан нестабільны, вельмі цяжкі. Усе астатнія 11 чалавек знаходзяцца ў здавальняючым стане, таксама ў здавальняючым стане і тыя, хто знаходзяцца на амбулаторным лячэнні", - расказала міністр.
Як удакладнілі ТАСС у прэс-службе рэгіянальнага Міністэрства аховы здароўя, павелічэнне колькасці пацярпелых звязана з тым, што людзі звяртаюцца па медыцынскую дапамогу пасля інцыдэнту. "У іх розныя несур'ёзныя траўмы, якія не патрабуюць стацыянарнага лячэння", - удакладнілі ў ведамстве.
У выніку стральбы, паводле апошніх даных Міністэрства аховы здароўя Расіі, загінулі шэсць чалавек.
Раніцай 20 верасня студэнт адкрыў стральбу на тэрыторыі кампуса Пермскага дзяржаўнага нацыянальнага даследчага ўніверсітэта, дзе ў той момант знаходзіліся амаль 3 тыс. чалавек. Частка навучэнцаў закрылася ў аўдыторыях, некаторыя выскоквалі з вокнаў.
Нападаючага затрымаў супрацоўнік ДПС з першага прыбыўшага на месца здарэння экіпажа: ён параніў стралка, пасля чаго аказаў яму першую дапамогу. Па факце стральбы СК Расіі ўзбудзіў крымінальную справу аб забойстве двух і больш асоб. Яе будзе расследаваць цэнтральны апарат ведамства.-0-