17 лістапада, Мінск /Кар. БЕЛТА/. Больш за 2,1 млн чалавек заразіліся каранавіруснай інфекцыяй у Еўрапейскім рэгіёне за мінулы тыдзень, звыш 28 тыс. памерлі. Як паведаміла ў ноч на 17 лістапада Сусветная арганізацыя аховы здароўя (СААЗ), колькасць новых выпадкаў інфіцыравання павялічылася ў рэгіёне за сем дзён на 8 працэнтаў, а лятальных канцоў - на 5 працэнтаў, пры гэтым у цэлым захваральнасць у свеце ўзрасла на 6 працэнтаў, а колькаць смярцей на 1 працэнт, паведамляе ТАСС.
"За тыдзень з 8 па 14 лістапада назіралася тэндэнцыя да росту колькасці новых выпадкаў (заражэння. - Заўвага ТАСС) у свеце, і іх колькасць перавысіла 3,3 млн у параўнанні з папярэднім тыднем, што ўяўляе сабой 6-працэнтны рост у параўнанні з мінулым тыднем", - гаворыцца ў эпідэмічным бюлетэні СААЗ. Колькасць лятальных канцоў вырасла на 1 працэнт і склала амаль 50 тыс. Падкрэсліваецца, што Еўрапейскі рэгіён СААЗ паведаміў аб 8-працэнтным павелічэнні выпадкаў заражэння і 5-працэнтным росце колькасці памерлых.
На гэты рэгіён прыпадае па выніках сямі дзён 64 працэнты заражаных (2 145 966) і 57 працэнтаў лятальных канцоў (28 304). За тыдзень захваральнасць вырасла, акрамя Еўрапейскага рэгіёна, толькі ў Амерыцы (на 8 працэнтаў) і Заходне-Ціхаакіянскім рэгіёне (на 6 працэнтаў). Яе зніжэнне адзначана ў Афрыцы (на 33 працэнты), Усходнім Міжземнамор'і (на 9 працэнтаў) і Паўднёва-Усходняй Азіі (на 3 працэнты). Колькасць лятальных канцоў асабліва значна зменшылася ва Усходнім Міжземнамор'і (на 14 працэнтаў), у той час як рост, акрамя Еўропы, зафіксаваны ў Афрыцы (на 3 працэнты) і Паўднёва-Усходняй Азіі (на 1 працэнт).
Згодна з прыведзенымі ў бюлетэні данымі, з 8 па 14 лістапада ў свеце выяўлены 3 346 517 заражаных і 49 584 выпадкі смерці. Аб самай вялікай колькасці інфіцыраваных за тыдзень паведамілі ЗША (550 684). Далей ідуць Расія (275 579), Германія (254 436), Вялікабрытанія (252 905) і Турцыя (180 167).
Варыянт дэльта, які прадаўжае дамініраваць над іншымі штамамі, за апошнія 60 дзён выяўлены ў 99,7 працэнта аналізаў, адзначае СААЗ.
Паводле даных СААЗ на 16 лістапада, у свеце з пачатку пандэміі зарэгістравана 253 640 693 пацверджаныя выпадкі заражэння каранавірусам, памерлі 5 104 899 чалавек.-0-
