Сцяг Пятніца, 29 сакавіка 2024
Усе навіны
Усе навіны
У свеце
18 чэрвеня 2021, 12:02

Колькасць бежанцаў за год вырасла на 4 працэнты - ААН

18 чэрвеня, Мінск /Кар. БЕЛТА/. Колькасць людзей, якія бягуць ад войнаў і насілля, вырасла на працягу 2020 года ў свеце на 4 працэнты, дасягнуўшы амаль 82,4 млн. Аб гэтым гаворыцца ў апублікаваным у Жэневе дакладзе Упраўлення Вярхоўнага камісара ААН па справах бежанцаў (УВКБ), паведамляе ТАСС.

"Нягледзячы на пандэмію каранавіруса колькасць людзей, якія бягуць ад войнаў, насілля, праследаванняў і парушэнняў правоў чалавека, у 2020 годзе вырасла амаль да 82,4 млн", - адзначылі эксперты, падкрэсліўшы, што ў канцы 2019 года гэта колькасць складала 79,5 млн, і агульны рост за 12 месяцаў склаў 4 працэнты. Сярод тых, хто мае патрэбу ў абароне, 48 млн - гэта прымусовыя перасяленцы. За год іх стала на 2,3 млн больш перш за ўсё з-за крызісаў у Эфіопіі, Судане, дзяржавах Сахеля, Мазамбіку, Емене, Афганістане і Калумбіі.

"За кожнай лічбай стаяць людзі, якія вымушана пакінулі свае дамы", - заявіў вярхоўны камісар ААН па справах бежанцаў Філіпа Грандзі, падкрэсліўшы, што яны заслугоўваюць увагі, падтрымкі і знаходжання рашэння. Паводле яго слоў, патрабуецца значна большая палітычная воля для ўрэгулявання канфліктаў.

Як адзначаецца ў дакладзе, сярод людзей, якія вымушана пакінулі свае дамы, 42 працэнты прыпадае на непаўналетніх, і яны асабліва неабаронены. Паводле ацэнак УВКБ, амаль 1 млн дзяцей нарадзіліся бежанцамі з 2018 па 2020 гады. Эксперты звяртаюць увагу на той факт, што ў разгар пандэміі ў 2020 годзе 160 краін закрылі свае граніцы, а 99 дзяржаў пры гэтым не рабілі выключэнняў у гэтым рэжыме для допуску на сваю тэрыторыю іншаземцаў, якія маюць патрэбу ў абароне. На працягу 2020 года ў свае дамы вярнуліся 3,2 млн вымушаных перасяленцаў і 251 тыс. бежанцаў. Яшчэ 33,8 тыс. чалавек атрымалі грамадзянства краін, на тэрыторыі якіх яны раней знайшлі прыстанішча.

Філіпа Грандзі заклікаў сусветных лідараў і тых, хто мае ўплыў, адкласці ўбок свае рознагалоссі і пакласці канец эгаістычным падыходам да палітыкі. На яго думку, трэба сканцэнтраваць намаганні на прадухіленні і ўрэгуляванні канфліктаў і забеспячэнні павагі правоў чалавека.-0-

Падпісвайцеся на нас у
Twitter
Топ-навіны
Свежыя навіны Беларусі