6 жніўня, Мінск /Кар. БЕЛТА/. Колькасць ахвяр узрыву ў сталіцы Лівана Бейруце павялічылася да 135, паведамляе тэлеканал Al Jazeera на сваім сайце.
Паводле абноўленых даных, загінулі сама меней 135 чалавек, паранены амаль 5 тыс. чалавек.
Афіцыйныя асобы заявілі, што чакаюць далейшага росту колькасці загінулых, паколькі ратавальнікі прадаўжаюць разбіраць завалы ў пошуках тых, хто выжаў.
Губернатар Бейрута Марван Абуд сказаў, што свае дамы страцілі да 300 тыс. чалавек. Улады працуюць над забеспячэннем іх ежай, вадой і прытулкам.
Узрыў у порце Бейрута здарыўся вечарам 4 жніўня. Мясцовыя ўлады назвалі прычынай надзвычайнага становішча дэтанацыю 2,7 тыс.т аміячнай салетры, што захоўвалася на складзе ў порце. Яна была канфіскавана мытнымі службамі ў 2015 годзе і заставалася ў порце. У Бейруце аб'яўлена двухтыднёвае надзвычайнае становішча, кантроль над бяспекай у сталіцы перададзены ваенным.-0-