23 ліпеня, Мінск /Кар. БЕЛТА/. Колькасць загінулых у выніку паводак у Бельгіі павялічылася да 37, пры гэтым яшчэ шэсць чалавек лічацца прапаўшымі без вестак, паведамляе інфармацыйнае агенцтва DPA.
Як паведамляе ТАСС, урадавы крызісны цэнтр у Бельгіі распаўсюдзіў у пятніцу папярэджанне, што ў краіне 24-25 ліпеня чакаюцца моцныя ападкі, што можа прывесці да падтапленняў на поўдні краіны. У заяве цэнтра падкрэсліваецца, што пагроза падтапленняў выклікана разбурэннем інфраструктуры і вадаводаў, а таксама засмечваннем рэчышчаў рэк на поўдні пасля магутнай паводкі 14-16 ліпеня.
"На поўдні чакаюцца навальніцы, аднак ападкі будуць менш інтэнсіўныя, чым ліўневыя дажджы, якія выклікалі паводкі 14 і 15 ліпеня. Улічваючы стан водных артэрый пасля ўдару стыхіі, існуе некаторая рызыка падтаплення асобных раёнаў", - гаворыцца ў дакуменце.-0-
