21 лютага, Мінск /Кар. БЕЛТА/. Кітайскія вучоныя змогуць падрыхтаваць вакцыну ад каранавіруса новага тыпу да клінічных выпрабаванняў не раней за канец красавіка. Аб гэтым 21 лютага на брыфінгу заявіў намеснік міністра навукі і тэхнікі КНР Сюй Наньпін, паведамляе ТАСС.
"Што датычыцца распрацоўкі вакцыны, згодна з комплекснымі даследаваннямі і папярэднімі разлікамі, вакцына будзе пададзена на клінічныя выпрабаванні не раней за апошнюю дэкаду красавіка", - адзначыў ён.
Успышка захворвання, выкліканага новым каранавірусам (2019-nCoV), была зафіксавана ў канцы снежня 2019 года ў кітайскім горадзе Ухань. Сусветная арганізацыя аховы здароўя прызнала яе надзвычайнай сітуацыяй міжнароднага маштабу, ахарактарызаваўшы як эпідэмію са шматлікімі ачагамі. За межамі КНР выпадкі заражэння былі выяўлены ў 25 краінах. Паводле апошніх даных, колькасць смяротных зыходаў у Кітаі склала 2236, паправіліся каля 18,2 тыс. чалавек, колькасць заражаных за ўвесь час распаўсюджвання віруса перасягнула 75,4 тыс.-0-
