7 чэрвеня, Мінск /Кар. БЕЛТА/. Кітайская Народная Рэспубліка глыбока занепакоена інцыдэнтам на Кахоўскай гідраэлектрастанцыі і магчымымі наступствамі здарэння. Як паведамляе ТАСС, аб гэтым заявіў на пасяджэнні Савета Бяспекі ААН пастаянны прадстаўнік Кітая пры ААН Чжан Цзюнь.
"Мы глыбока занепакоены гуманітарнымі, эканамічнымі і экалагічнымі наступствамі", - сказаў Чжан Цзюнь. Паводле слоў кітайскага дыпламата, Кітай звяртаецца з заклікам да ўсіх бакоў канфлікту "прыкладаць усе намаганні для абароны мірнага насельніцтва і грамадзянскай інфраструктуры".
Таксама дыпламат заявіў, што КНР заклікае прыкласці намаганні, каб не дапусціць ядзернай катастрофы з-за існуючай пагрозы бяспецы дзейнасці Запарожскай АЭС (ЗАЭС) пасля пашкоджання дамбы Кахоўскай гідраэлектрастанцыі і справакаванага гэтым абмялення Кахоўскага вадасховішча. Пекін адзначае, што трэба праявіць максімальную стрыманасць, устрымлівацца ад заяў і дзеянняў, якія могуць прывесці да эскалацыі канфлікту.
Пастаянны прадстаўнік Расіі пры ААН Васіль Нябензя ўсклаў адказнасць за разбурэнне дамбы на ўлады Украіны. Ён заявіў на пасяджэнні, што ўкраінскі бок у тым ліку мог ставіць перад сабой мэту ўчыніць правакацыю супраць Запарожскай АЭС. "Не выключаем таксама ў гэтым і падспудную спробу правакацыі адносна Запарожскай АЭС", - адзначыў ён. "Зробленая Кіевам наўмысная дыверсія супраць аб'екта крытычнай інфраструктуры мае вельмі небяспечны характар і па сваёй сутнасці можа быць аднесена да разраду ваенных злачынстваў або тэрактаў", - падкрэсліў ён у ходзе свайго выступлення на пасяджэнні Савета Бяспекі ААН.
Пастаянны прадстаўнік Украіны пры ААН Сяргей Кісліца абвінаваціў РФ у пашкоджанні Кахоўскай ГЭС і назваў здарэнне "маштабным экалагічным тэрактам". Аб гэтым гаворыцца на афіцыйным сайце Арганізацыі Аб'яднаных Нацый.
Экстраннае пасяджэнне Савета Бяспекі ААН па сітуацыі на Кахоўскай ГЭС прайшло позна вечарам 6 чэрвеня.
У ноч з 5 на 6 чэрвеня была пашкоджана верхняя частка Кахоўскай ГЭС у раёне горада Новая Кахоўка ў Херсонскай вобласці. Гэта прывяло да некантралюемага скідвання вады. Дзясяткі населеных пунктаў, у тым ліку Херсон і Новую Кахоўку, пачало затапляць вадой. Спатрэбілася эвакуацыя насельніцтва. Па факце разбурэння дамбы Кахоўскай ГЭС Следчы камітэт РФ узбудзіў крымінальную справу аб тэракце.-0-
