15 красавіка, Мінск /Кар. БЕЛТА/. Кітай не мае намеру вызваляць частку сваіх рэзерваў збожжавых для аблягчэння сітуацыі на еўрапейскіх рынках. Ён будзе таксама прадаўжаць закупкі на знешніх рынках для забеспячэння сваёй харчовай бяспекі. Аб гэтым піша кітайская эканамічная газета "Цзінцзі жыбаа", паведамляе ТАСС.
"Некаторыя замежныя медыя апошнім часам сцвярджалі, што нарошчванне кітайскіх збожжавых рэзерваў нібы "апярэдзіла" расійска-ўкраінскі канфлікт, справакаваўшы рост цэн на глабальным збожжавым рынку, яны нават заклікалі Кітай вызваліць 20 працэнтаў сваіх запасаў збожжа для выратавання еўрапейскага рынку", - адзначае выданне, называючы гэтыя патрабаванні абсурднымі.
З пачатку гэтага года, адзначае газета, цэны на збожжавыя ў Кітаі знаходзіліся пад націскам з-за існуючых эпідэмічных абмежаванняў, засухі ў Паўднёвай Амерыцы і расійска-ўкраінскага канфлікту. КНР тым не менш падтрымлівала стабільнасць цэн на ўнутраным рынку.
Аднак, падкрэсліваецца далей, вострая няхватка некаторых сельскагаспадарчых прадуктаў, напрыклад соевых бабоў і насення сланечніка, уяўляе патэнцыяльную пагрозу харчовай бяспецы краіны. Рэзкае зніжэнне запасаў збожжа значна паўплывае на іх устойлівыя пастаўкі і выкліча рыначныя ўзрушэнні, лічыць выданне.
"Таму Кітай будзе рабіць усё, што ад яго залежыць, для забеспячэння ўласнай збожжавай вытворчасці і паставак імпартнай сельгаспрадукцыі, каб справіцца з цяперашняй нявызначанасцю ў міжнародным становішчы", - рэзюмуе "Цзінцзі жыбаа".-0-
