27 кастрычніка, Мінск /Кар. БЕЛТА/. У многіх кавідных аддзяленнях украінскіх бальніц склалася патавая сітуацыя - хворым не хапае запасаў кіслароду, паведамляе ўкраінскае выданне "Страна".
Ва Украіне два буйнейшыя заводы па вытворчасці медыцынскага кіслароду спынілі работу для правядзення рэгламентных работ у час успышкі захваральнасці на COVID-19. У выніку Украіне давялося купляць кісларод у Польшчы. Аднак закупка польскага кіслароду відавочна не вырашыла праблему. Ложка-месцы з падключаным кіслародам заканчваюцца, а ў некаторых месцах кіслароду хопіць толькі на дзень.
Найбольш складаная сітуацыя ў Данецкай, Запарожскай, Сумскай, Адэскай, Херсонскай і Мікалаеўскай абласцях.
Так, у Данецкай вобласці занята 89,03 працэнта ложка-месцаў з кіслародам. У адміністрацыйным цэнтры вобласці горадзе Краматорску кісларод можа скончыцца ўжо сёння. "Свабодных ложкаў у медустановах няма. Пастаўшчык ужо не можа забяспечваць нашы бальніцы кіслародам", - сказаў мэр горада Аляксандр Ганчарэнка.
Не менш складаная сітуацыя ў Славянску. Кіраўнік мясцовай адміністрацыі Вадзім Лях расказаў, што хворых на каранавірус ужо размяшчаюць у калідорах бальніц. "Запоўненасць ложкаў на 100 працэнтаў. Колькасць кавідных ложкаў можна будзе павялічваць да таго часу, пакуль будзе хапаць кіслародных канцэнтратараў і ўрачоў", - гаворыць Вадзім Лях.
У сацсетках жыхары Славянска пішуць, што ў хуткай дапамозе проста не прымаюць званкі. Начальніца мясцовага аддзела аховы здароўя Алена Джым прызнала перабоі ў рабоце хуткай дапамогі з-за нагрузак. Таму па нумары 103 трэба званіць некалькі разоў, гаворыць яна.
У Запарожскай вобласці занята 84,81 працэнта ложка-месцаў з кіслародам. У бярдзянскіх бальніцах кіслароду можа хапіць усяго на некалькі дзён, заявіў дырэктар Бярдзянскага тэрытарыяльнага медыцынскага аб'яднання Дзмітрый Ягораў. Паводле яго слоў, знізілася не толькі аплата працы медперсаналу, але і здольнасць закупляць лякарствы для кавіднага шпіталя. Гэта пагражае ў недалёкім будучым набыццём медпрэпаратаў за кошт пацыентаў.
Яшчэ адна праблема, з якой сутыкнуліся ў Бярдзянску, - гэта няхватка кваліфікаваных медыцынскіх кадраў. На медработнікаў, якія засталіся працаваць у іншых профільных аддзяленнях, кладзецца двайная нагрузка.
Аб крытычным дэфіцыце кіслароду паведамілі ў адэскай інфекцыйнай бальніцы. Паводле даных мясцовых СМІ, раніцай 26 кастрычніка заставалася менш за тону гэтага жыватворнага газу, пры тым што клініка спажывае ад 6 да 8 т штодзённа. Сваякі хворых заявілі, што недахоп кіслароду прывёў ужо да гібелі некалькіх чалавек. Людзям давялося купляць балоны і завозіць іх у бальніцу за свой кошт.
Пры гэтым у мэрыі афіцыйна адмаўляюць крызіс. Намеснік гарадскога галавы Святлана Бядрэга на апаратнай нарадзе заявіла, што з 310 месцаў у інфекцыйнай бальніцы да кіслароду падключаны 239, свабодны 241 кіслародны канцэнтратар. Аднак сваякі пацыентаў абвяргаюць гэтыя даныя. Пацыентаў з Адэсы пачалі ўжо вывозіць у Кіеў.
Але і ў Кіеве сітуацыя таксама напружаная. Дырэктар кіеўскай гарадской бальніцы нумар 6 Вадзім Кражэўскі гаворыць, што з 350 кавідных месцаў запоўненасць складае 97 працэнтаў. "Сітуацыя не крытычная, але запасаў кіслароду ўсяго на 2-3 дні, гэта пры тым што мы яго пастаянна папаўняем", - расказвае ён.
Па факце ўжо сёння ў медыцынскай сістэме здарыўся калапс: у рэгіёнах кісларод шукаюць і дастаўляюць пасля звышнамаганняў і падключэння вышэйшага мясцовага кіраўніцтва. Гэта значыць выратаванне жыццяў перайшло на ручное кіраванне, адзначае выданне "Страна".
Паказальна, што ў разгар эпідэміі ва Украіне адразу два асноўныя пастаўшчыкі кіслароду раптам "зразумелі", што кіслароду на ўсіх не хопіць. Паводле крыніц "Страны" ў Міністэрстве аховы здароўя, кіраўнік ведамства Віктар Ляшко быў загадзя інфармаваны аб хуткім прыпыненні паставак кіслароду. Акрамя таго, кіраўнік Міністэрства аховы здароўя быў яшчэ ў чэрвені папярэджаны, што восенню патрэбнасць у кіслародзе ўзрасце больш як у пяць разоў, сцвярджае кіраўнік Нацыянальнай медыцынскай палаты, эпідэміёлаг Сяргей Краўчанка.
"У краіне ёсць урад, Міністэрства аховы здароўя, офіс прэзідэнта і цэлы прэзідэнт. І "нечакана" для іх у разгар чарговай хвалі захворвання прыватныя прадпрыемствы зрушваюць тэрміны рэгламентных работ з прычыны "крайняй неабходнасці". Усё гэта вельмі падобна да карпаратыўнай змовы. І ўзняць цэны ў разы. Рыхтуйцеся да таго, што цяпер бальніцы будуць купляць кісларод па 20-30 тыс. грыўняў. Якія будуць узяты з дзяржаўнага і муніцыпальных бюджэтаў. Да стварэння штучнага дэфіцыту маюць дачыненне вышэйшыя кіраўнікі Міністэрства аховы здароўя, а таксама ОП. Гэта мільярды грыўняў, украдзеныя з кішэняў украінцаў", - растлумачыў высокапастаўлены супрацоўнік Міністэрства аховы здароўя Украіны.-0-