14 чэрвеня, Бішкек /БЕЛТА - Кабар/. Па выніках пасяджэння Савета кіраўнікоў дзяржаў - членаў Шанхайскай арганізацыі супрацоўніцтва (ШАС) была падпісана Бішкекская дэкларацыя Савета кіраўнікоў дзяржаў - членаў ШАС, а таксама каля 20 іншых дакументаў.
Па выніках мерапрыемства была прынята Праграма развіцця дзяржаў - членаў ШАС. Удзельнікі саміту ўзгаднілі рабочы план па рэалізацыі пунктаў Праграмы дзеянняў па выкананні Антынаркатычнай стратэгіі дзяржаў - членаў ШАС на 2018-2023 гады. Таксама быў зацверджаны шэраг рашэнняў, што датычацца супрацоўніцтва ў гуманітарнай сферы, у галіне лічбавізацыі і інфармацыйна-камунікацыйных тэхналогій, міжрэгіянальнага ўзаемадзеяння, сродкаў масавай інфармацыі, фізічнай культуры і спорту, аховы здароўя. Сярод іншых дакументаў на саміце была падпісана дарожная карта далейшых дзеянняў Кантактнай групы "ШАС-Афганістан".
У саміце кіраўнікоў дзяржаў - членаў ШАС прынялі ўдзел прэзідэнты Расіі, Казахстана, Узбекістана, Таджыкістана, Ірана, старшыня КНР, прэм'ер-міністры Індыі і Пакістана. У якасці краін-наглядальнікаў у пасяджэнні прынялі ўдзел Беларусь, Манголія, Афганістан. Саміт наведалі прадстаўнікі міжнародных арганізацый ААН, АДКБ, СНД, ЕЭК.
На пасяджэнні ў пашыраным фармаце бакі абмеркавалі шырокі спектр тэм. Асаблівая ўвага ўдзялялася праблемам рэгіянальнай бяспекі, у прыватнасці, лідары заявілі аб жаданні мірнага ўрэгулявання сітуацыі ў Афганістане, а таксама пытаннях лічбавізацыі, удасканалення заканадаўства ШАС.-0-
