9 снежня, Мінск /Кар. БЕЛТА/. Украіна гатова пайсці на шэраг уступак у дыялогу з Расіяй, але толькі на аснове ўзаемнасці і ў тых пытаннях, якія не з'яўляюцца для Кіева прынцыповымі. Аб гэтым заявіў у сераду ў інтэрв'ю брытанскаму тэлеканалу Sky News кіраўнік украінскага МЗС Дзмітрый Кулеба, паведамляе ТАСС.
"Мы падыходзім да справы канструктыўна і гатовы ісці на ўступкі, але толькі пры ўмове ўзаемных уступак з боку Расіі. Пры гэтым мы не будзем уступаць у пытаннях, якія маюць асноватворнае значэнне для развіцця ўкраінскай дзяржавы, уключаючы пытанні нашай еўрапейскай і еўраатлантычнай інтэграцыі, - сказаў ён. - Патрабаванні павінны быць разумнымі і легітымнымі. Патрабаванні Расіі наконт таго, каб Украіна адмовілася ад сваёй знешняй палітыкі, каардынавала з Расіяй працэс нашай інтэграцыі ў НАТА або адмовілася ад гэтых планаў, нелегітымныя".
Міністр таксама заклікаў краіны Захаду задумацца над тым, як далёка ім давядзецца зайсці ва ўступках Маскве, калі яны выберуць гэты шлях дзеля стрымлівання РФ. Ён выступіў са сцверджаннем, што Расія ўжо выкарыстоўвае газаправод "Паўночны паток - 2" супраць Украіны як эканамічную зброю, і паведаміў аб намеры абмеркаваць планы новага кіраўніцтва Германіі адносна гэтага праекта.
.
Акрамя таго, Дзмітрый Кулеба заявіў, што на выпадак узброенага канфлікту паміж Расіяй і Украінай заходнія партнёры Кіева ўзгадняюць "комплексны пакет мер па стрымліванні" Масквы, які ўключае "беспрэцэдэнтныя санкцыі", што прывядуць да "катастрофы для расійскай эканомікі". Ён падкрэсліў, што Украіна не просіць краіны НАТА ўдзельнічаць у нібы магчымым ваенным канфлікце з РФ, аднак настойвае на неабходнасці аказання дапамогі Кіеву ва ўмацаванні яго абароннага патэнцыялу.
Паводле слоў міністра, каля граніц Украіны, у тым ліку ў Крыме, Данецкай і Луганскай народных рэспубліках, сканцэнтраваны 150 тыс. расійскіх ваеннаслужачых, аднак, згодна з ацэнкамі Кіева, Расія мае магчымасць ажыццявіць хуткую перакідку сваіх сіл да ўкраінскіх рубяжоў.-0-
