16 студзеня, Мінск /Кар. БЕЛТА/. Каля 25 тыс. ваеннаслужачых Нацыянальнай гвардыі ЗША будуць перакінуты ў амерыканскую сталіцу ў сувязі з забеспячэннем бяспекі на інаўгурацыі выбранага прэзідэнта Джозефа Байдэна, якая адбудзецца 20 студзеня. Аб гэтым гаворыцца ў распаўсюджанай пісьмовай заяве камандуючага Нацыянальнай гвардыі генерала Арміі (сухапутных войскаў) ЗША Дэніэла Хокансана, паведамляе ТАСС.
"Міністэрства абароны дало згоду прадаставіць да 25 тыс. ваеннаслужачых для падтрымкі забеспячэння бяспекі ў час інаўгурацыі выбранага прэзідэнта", - адзначыў Дэніэл Хокансан. Паводле яго слоў, ваеннаслужачыя будуць дапамагаць Сакрэтнай службе ЗША, якая адказвае за бяспеку на мерапрыемстве.
Ён растлумачыў, што ваеннаслужачыя, адпраўленыя з усіх 50 штатаў, будуць размешчаны вакол горада для абароны сталіцы краіны. Як раней паведамілі ў Пентагоне, многія з іх будуць узброены. Генерал падкрэсліў, што ў горад на гэты час прыбылі каля 7 тыс. прадстаўнікоў Нацгвардыі. Раней паведамлялася, што ў сталіцу будуць перакінуты 20 тыс. ваеннаслужачых.
Часці амерыканскай Нацгвардыі раскватараваны ў кожным штаце, падначальваюцца губернатарам і прэзідэнту. Нацгвардыя з'яўляецца арганізаваным рэзервам Арміі (сухапутных войскаў) і ВПС ЗША, які можа быць задзейнічаны ў надзвычайных сітуацыях, напрыклад для ліквідацыі наступстваў стыхійных бедстваў, падтрымання правапарадку.
Прыхільнікі дзеючага амерыканскага лідара Дональда Трампа 6 студзеня паспрабавалі перашкодзіць зацвярджэнню ў амерыканскім Кангрэсе вынікаў праведзеных 3 лістапада прэзідэнцкіх выбараў, перамогу на якіх атрымаў Джозеф Байдэн. У выніку беспарадкаў загінулі некалькі чалавек, у тым ліку адзін паліцэйскі.
Кампетэнтныя органы ЗША прымаюць павышаныя меры бяспекі ў Вашынгтоне напярэдадні інаўгурацыі Джозефа Байдэна. Значная частка цэнтра горада, прылеглая да Белага дома і Кангрэса, перакрыта для руху аўтатранспарту. Капіталійскі ўзгорак ачэплены, допуску туды ўжо некалькі дзён для шырокай грамадскасці няма.-0-
