25 мая, Мінск /Кар. БЕЛТА/. Аўтаномная супольнасць Мадрыд і Барселона пераходзяць з 25 мая на новы этап аслаблення абмежавальных мер, уведзеных для стрымлівання распаўсюджвання каранавіруса. Пры гэтым большая частка насельніцтва перайшла на гэту фазу яшчэ тыдзень таму, паведамляе ТАСС.
З сённяшняга дня жыхарам Мадрыда і Барселоны дазволена сустракацца з сябрамі і сваякамі, якія пражываюць у адной правінцыі. Разам з тым нельга збірацца групамі, колькасць якіх перасягае 10 чалавек.
Гуляць і займацца спортам на вуліцы можна ў тыя часавыя інтэрвалы, якія былі ўсталяваны раней для розных груп асоб. Акрамя таго, іспанцам пакуль не дазволілі выязджаць за межы правінцыі, у якой яны пражываюць. Бары, кафэ і рэстараны змогуць адкрыць тэрасы для наведвальнікаў, адначасова можа быць занята не больш за 50 працэнтаў ад звычайнай колькасці столікаў, якія давядзецца дэзынфіцыраваць пасля кожнага кліента. Таксама часткова могуць аднавіць сваю дзейнасць спартзалы, музеі, цэрквы. Зноў будуць адкрыты і атэлі, але без зон агульнага карыстання, абедзенных залаў і басейнаў. Таксама дазваляецца паляванне і спартыўная рыбалка.
Адначасова з гэтым амаль палавіна насельніцтва краіны пражывае ў рэгіёнах, якія з сённяшняга дня чакае ўжо трэці з чатырох аб'яўленых уладамі этапаў аслаблення абмежаванняў. На гэтай фазе іспанцам усё яшчэ нельга выязджаць за межы сваіх правінцый, аднак знікаюць часавыя інтэрвалы для прагулак і заняткаў спортам на вуліцы. Дазваляюцца сустрэчы з блізкімі - 15 чалавек максімум. Кафэ і рэстараны цяпер могуць абслугоўваць кліентаў унутры устаноў, а не толькі на тэрасах, як на папярэднім этапе змякчэння абмежаванняў. Але адначасова можа быць занята не больш за 40 працэнтаў ад звычайнай колькасці столікаў. На цяперашняй фазе зноў адкрываюцца для адпачынку пляжы і басейны, дазволена зноў пачаць дзейнасць гандлёвым цэнтрам, тэатрам, кінатэатрам, спартзалам з абмежаваннямі на адначасовае наведванне асоб. Таксама можна адсвяткаваць вяселле, аднак колькасць запрошаных не павінна перасягаць 50 чалавек, калі цырымонія праходзіць у закрытым памяшканні.
У краіне выяўлена 235,8 тыс. хворых, 28 752 пацыенты памерлі. Аўтаномныя супольнасці Мадрыд і Каталонія з'яўляюцца найбольш пацярпелымі з-за пандэміі рэгіёнамі Іспаніі.-0-
