12 снежня, Мінск /Кар. БЕЛТА/. Паліцыя нямецкай федэральнай зямлі Бадэн-Вюртэмберг узмацніла кантроль на граніцы з Францыяй пасля інцыдэнту са стральбой у Страсбургу, паведамляе нямецкая тэлерадыёкампанія Deutsche Welle.
Супрацоўнікі паліцыі правяраюць усіх тых, хто ўязджае з боку Страсбурга. Акрамя таго, аўтамабілістаў папрасілі па магчымасці ўстрымацца ад перасячэння граніцы ў гэтым раёне.
Паводле даных нямецкага часопіса Der Spiegel, мужчына, які адкрыў стральбу ў Страсбургу, раней быў судзімы ў Германіі за крадзеж. Пасля адбывання пакарання ў 2017 годзе ён быў дэпартаваны ў Францыю. Французская газета Le Parisien таксама паведаміла, што ў ходзе вобыску ў яго кватэры былі знойдзены гранаты.
Як паведамлялася, тры чалавекі загінулі ў выніку стральбы 11 снежня на калядным кірмашы ў цэнтры Страсбурга. Яшчэ, паводле ўдакладненых даных, 13 грамадзян пацярпелі. Падазроны - 29-гадовы ўраджэнец Страсбурга. У яго пошуках задзейнічаны 350 паліцэйскіх, два верталёты, салдаты антытэрарыстычнага падраздзялення.-0-