21 студзеня, Мінск /Кар. БЕЛТА/. Генеральная Асамблея ААН прыняла рэзалюцыя, у якой асуджае і адхіляе адмаўленне халакосту як гістарычнага факта. Аб гэтым паведамляецца на сайце Цэнтра навін ААН.
"Генеральная Асамблея ААН адхіляе і безагаворачна асуджае любое поўнае або частковае адмаўленне халакосту як гістарычнай падзеі. Настойліва заклікае ўсе дзяржавы-члены безагаворачна адхіляць любое поўнае або частковае адмаўленне халакосту як гістарычнай падзеі або любое скажэнне яго гісторыі і любыя дзеянні, што робяцца з гэтай мэтай", - гаворыцца ў прынятай рэзалюцыі.
У Генасамблеі нагадалі аб знішчэнні амаль 6 млн яўрэяў, у тым ліку 1,5 млн дзяцей, што складае адну трэць усіх яўрэяў. У ходзе халакосту былі забіты таксама мільёны прадстаўнікоў іншых нацыянальнасцей. Аўтары рэзалюцыі падкрэслілі, што напамін аб халакосце павінен служыць перасцярогай ад небяспек, якія тояць у сабе нянавісць, фанатызм, расізм.
Генеральная Асамблея ААН настойліва заклікала дзяржавы-члены і кампаніі, якія валодаюць сацыяльнымі сеткамі, актыўна прымаць меры, каб процідзейнічаць выкарыстанню інфармацыйна-камунікацыйных тэхналогій для распаўсюджвання матэрыялаў у мэтах прапаганды антысемізму, адмаўлення халакосту і скажэння яго гісторыі, а таксама садзейнічаць выяўленню інфармацыі аб такіх матэрыялах.
Сааўтарамі рэзалюцыі выступілі больш за 60 краін, сярод якіх Ізраіль, Германія, Беларусь, Арменія, Турцыя, ЗША.-0-