28 лістапада, Мінск /Кар. БЕЛТА/. Расійскі холдынг "Газпрам" прыняў рашэнне не змяншаць аб'ёмы газу, што ідзе транзітам праз украінскую тэрыторыю ў Малдову, паведамляе ТАСС.
Гэта рашэнне прынята пасля таго, як энергетычная кампанія "Малдовагаз" устараніла раней існаваўшыя парушэнні пры разліку за лістападаўскія пастаўкі газу з Расіі. У прыватнасці, у "Газпраме" праінфармавалі, што на рахункі холдынга былі пералічаны сродкі за газ, які ішоў у Малдову, але "асеў" ва Украіне.
Разам з тым у расійскім холдынгу падкрэслілі, што Кішынёў не першы раз парушае абавязацельствы, прапісаныя ў кантракце з "Газпрамам" на пастаўкі газу. Парушэнні датычацца аплаты за блакітнае паліва. У сувязі з гэтым адзначаецца, што "Газпрам" у выпадку такіх парушэнняў можа знізіць аб'ёмы газу, пастаўляемыя Малдове, або поўнасцю спыніць транзіт.
Раней паведамлялася, што расійскі газ, які быў прызначаны Малдове, пачаў "асядаць" ва Украіне. У "Газпраме" заявілі, што калі сітуацыя не вырашыцца, то з 28 лістапада падача газу для транзіту праз Украіну будзе скарочана.-0-
