6 красавіка, Мінск /Кар. БЕЛТА/. У Чэхіі ва ўмовах каранціну з-за эпідэміі каранавіруса фермеры звярнуліся да ўрада з просьбай дазволіць ім вярнуцца на рынкі, паведамляе Radio Prague.
Кіраўнік "Асацыяцыі фермерскіх рынкаў" Іржы Седлачак лічыць, што аднаўленне работы прадуктовых рынкаў, закрытых з 10 сакавіка, дапаможа многім фермерам выжыць ва ўмовах агульнага жорсткага каранціну. Інакш разарыцца ў бліжэйшы час могуць каля 40 невялікіх сямейных ферм. У цяперашніх умовах яны пазбаўлены абсалютна ўсіх даходаў.
Для адкрыцця рынкаў фермеры распрацавалі спецыяльную мадэль гандлю, якая поўнасцю адпавядае строгім патрабаванням гігіены. "Гандаль павінен ажыццяўляцца выключна з транспарту фермераў з захаваннем неабходнай адлегласці паміж прадаўцом і пакупнікамі. Прылаўкі павінны перыядычна дэзынфіцыравацца. У наяўнасці будуць сродкі індывідуальнай абароны і абеззаражвальныя сродкі для рук", - сказаў Іржы Седлачак.
"Асацыяцыя фермерскіх рынкаў" будзе сачыць, каб аплата ў пераважнай большасці выпадкаў праводзілася банкаўскімі карткамі. Наяўнымі сродкамі можна будзе разлічвацца толькі пры дапамозе спецыяльна назначаных прадаўцоў, якія ні ў якім разе не будуць дакранацца да прадукцыі, выстаўленай на прылаўках.
Адказ на свой зварот фермеры пакуль не атрымалі.-0-
