24 кастрычніка, Ла-Пас /БЕЛТА - Прэнса Лаціна/. Прэзідэнт Балівіі Эва Маралес аб'явіў сёння аб сваёй перамозе ў першым туры прэзідэнцкіх выбараў.
Паводле даных Вышэйшага выбарчага суда рэспублікі, падлічана 98,5 працэнта галасоў. За дзеючага прэзідэнта прагаласавалі 46,83 працэнта выбаршчыкаў, яго асноўнага саперніка Карласа Месу падтрымалі 36,7 працэнта.
Згодна з дзеючымі ў Балівіі законамі, для перамогі ў першым туры кандыдату, які заручыўся найбольшай падтрымкай насельніцтва, неабходна набраць больш за 50 працэнтаў галасоў або 40 працэнтаў пры ўмове, што адрыў ад яго бліжэйшага саперніка складае не менш як 10 працэнтаў. Калі ніхто з прэтэндэнтаў на вышэйшую пасаду не дасягне гэтага выніку, другі тур галасавання пройдзе 15 снежня.
Галасаванне на прэзідэнцкіх і парламенцкіх выбарах прайшло ў Балівіі 20 кастрычніка, першыя папярэднія вынікі былі апублікаваны праз амаль чатыры гадзіны пасля закрыцця ўчасткаў. Пасля іх абвяшчэння Меса заявіў, што вынікі праведзенага галасавання павінны дазволіць яму выйсці ў другі тур. Маралес у сваю чаргу сказаў, што не падлічаныя на той момант галасы жыхароў сельскіх раёнаў гарантуюць яму перамогу ў першым ужо туры.-0-
