23 мая, Мінск /Кар. БЕЛТА/. Санкцыі заходніх краін прывялі да дэфіцыту ўгнаенняў у свеце. Харчовы крызіс цяпер пагражае лацінаамерыканскім дзяржавам, якія, здавалася б, не маюць ніякага дачынення да канфлікту ва Украіне, паведамляе Euronews.
Так, венесуэльскія фермеры могуць страціць ураджай з-за няхваткі ўгнаенняў. "Дэфіцыт пшаніцы, сланечнікавага алею, кукурузы, соі, а таксама ўгнаенняў закране ўсе краіны, таму што Расія, Украіна і Беларусь уваходзяць у лік найбуйнейшых вытворцаў угнаенняў у свеце", - расказаў кіраўнік венесуэльскай Федэрацыі фермераў Сэлса Фанцінэль.
Ён адзначыў, што Венесуэле неабходна звыш 150 тыс. т угнаенняў, каб атрымаць добры ўраджай. У той жа час на сённяшні дзень запасы складаюць усяго 100 тыс. т. Паспець закупіць угнаенні да пачатку палявых работ наўрад ці ўдасца.
Венесуэла на працягу доўгага часу зведвае на сабе цяжар санкцыйнай палітыкі ЗША. Таму краіна не можа свабодна імпартаваць тавары медыцынскага прызначэння і прадукты харчавання з іншых краін. Цяпер, калі Захад увёў антырасійскія санкцыі, яны ўскосна закранулі і Венесуэлу. Калі нічога не зменіцца, становішча ў краіне можа значна пагоршыцца.
"Нам давядзецца абмежавацца існуючымі аб'ёмамі ўгнаенняў. І мы ўжо ведаем, што іх не хопіць. Будзем прымяняць менш, чым патрабуецца, а гэта значна паўплывае не толькі на ўраджайнасць, але і на прыбытак фермераў", - заявіў кіраўнік Асацыяцыі незалежных вытворцаў Венесуэлы.-0-
