26 кастрычніка, Баку /Эдуард Півавар - БЕЛТА/. Еўразійскі эканамічны форум, які 14 гадоў праходзіў у італьянскай Вероне, у бягучым годзе змяніў сваё месца прапіскі на Баку. 15-ы па ліку форум пройдзе ў сталіцы Азербайджана 27-28 кастрычніка, паведамілі карэспандэнту БЕЛТА яго арганізатары.
Гэта мерапрыемства, якое традыцыйна збірала палітыкаў, экспертаў, дыпламатаў, кіраўнікоў буйнейшых кампаній і журналістаў з Захаду і Усходу, праходзіла на тэрыторыі Італіі нават у самы разгар пандэміі COVID-19. Аднак сённяшнія геапалітычныя рэаліі ўсё ж вымусілі арганізатараў змяніць традыцыйнае месца правядзення форуму.
"Я вельмі рады, што, нягледзячы на глабальныя складанасці, XV Еўразійскі эканамічны форум адбудзецца, хоць не ў італьянскай Вероне, як звычайна, а ў Баку, - сказаў яго ідэйны натхняльнік, старшыня савета дырэктараў італьянскага Банка Інтэза, прэзідэнт асацыяцыі "Пазнаём Еўразію" Антоніа Фаліка. - Сталіца Азербайджана выбрана таму, што геаграфічна яна знаходзіцца ў цэнтральнай частцы еўразійскай прасторы паміж Атлантыкай і Ціхім акіянам, на граніцы Еўропы і Азіі, гістарычна з'яўляецца скрыжаваннем гандлёвых шляхоў. У свеце, які хутка мяняецца, менавіта гэта прастора становіцца асабліва важнай для забеспячэння ўсёй планеце бяспекі і працвітання. Толькі спалучыўшы намаганні, можна пабудаваць новую эканоміку, у цэнтры якой будзе знаходзіцца чалавек. У гэтым плане ключавую ролю адыгрывае дыпламатыя бізнесу, якая можа пашыраць агульныя інтарэсы эканамічнага развіцця, шукаць тое, што збліжае, а не раз'ядноўвае, новыя агульныя падыходы і магчымасці для супрацоўніцтва і росту. Упэўнены, што цяперашні форум зможа знайсці рэалістычныя і канструктыўныя напрамкі сацыяльна-эканамічнага развіцця ў інтарэсах працвітання ўсяго чалавецтва".
Удзельнікі форуму абмяркуюць шырокае кола практычных пытанняў і актуальных праблем у галіне эканомікі і фінансаў, аховы здароўя, экалогіі, энергетыкі і тэхналагічных інавацый на прасторы Вялікай Еўразіі, аб'яднаных у гэтым годзе глабальнай тэмай "Еўразія на шляху да новага геапалітычнага і сацыяльна-эканамічнага парадку: пераход да новай эканомікі, арыентаванай на чалавека". У першы дзень работы форуму адбудуцца сесіі, прысвечаныя глабальным выклікам у энергетыцы, пытанням энергабяспекі Еўропы, ролі бізнесу ў глабальнай геапалітыцы і стварэнні эканомікі супрацоўніцтва ад Атлантыкі да Ціхага акіяна.
Арганізатарамі мерапрыемства выступаюць некамерцыйная асацыяцыя "Пазнаём Еўразію" (Італія), фонд "Раскангрэс", Пецярбургскі міжнародны эканамічны форум пры падтрымцы Міністэрства эканомікі Азербайджана.-0-
