14 лютага, Мінск /Кар. БЕЛТА/. Пошукава-выратавальным атрадам у Турцыі ўдалося выратаваць з-пад завалаў пасля землетрасенняў больш як 8 тыс. чалавек. Аб гэтым заявіў прэзідэнт Турцыі Рэджэп Таіп Эрдаган у сваім відэазвароце, які ён накіраваў Сусветнаму ўрадаваму саміту ў ААЭ. Аб гэтым інфармуе Агенцтва Анадолу.
Кіраўнік дзяржавы назваў землетрасенні, якія адбыліся ў краіне, найвялікшым бедствам у гісторыі Турцыі і ўсяго чалавецтва. Колькасць загінулых прадаўжае расці па меры таго, як ратавальнікі разбіраюць завалы. Большая частка з 81 тыс. параненых у выніку землетрасенняў на гэты час ужо выпісаны з бальніц.
Рэджэп Таіп Эрдаган нагадаў, што Турцыя атрымала паведамленні з падтрымкай больш як ад 100 краін свету. Прэзідэнт выказаў удзячнасць усім дружалюбным дзяржавам, якія аказалі дапамогу краіне і адправілі свае пошукава-выратавальныя атрады ў Турцыю. "Мы ніколі не забудзем вашу дружбу ў гэты цёмны дзень, якую вы праявілі. Гэта катастрофа яшчэ раз паказала, наколькі важная міжнародная салідарнасць", - адзначыў Эрдаган.
Паводле апошніх даных, ахвярамі разбуральных землетрасенняў у Турцыі сталі 31 974 чалавекі. З рэгіёна ў іншыя правінцыі эвакуіравана больш як 158 тыс. чалавек. У дзесяці пацярпелых у выніку землетрасенняў правінцыях на 90 дзён аб'яўлены рэжым ЧП.-0-
