21 красавіка, Мінск /Кар. БЕЛТА/. Суд прысяжных у Мінеапалісе (штат Мінесота) прызнаў вінаватым па ўсіх пунктах абвінавачання экс-паліцэйскага Дэрэка Шовіна, якому інкрымінуецца ненаўмыснае забойства цемнаскурага Джорджа Флойда. Аб гэтым заявіў у аўторак суддзя Пітэр Кэхіл, трансляцыю з залы суда вялі цэнтральныя тэлеканалы, паведамляе ТАСС.
Дэрэк Шовін прызнаны вінаватым у забойстве другой і трэцяй ступені, гэта значыць ненаўмысным, а таксама ў прычыненні смерці Джорджу Флойду па неасцярожнасці другой ступені. Самым цяжкім з гэтых злачынстваў з'яўляецца забойства другой ступені. Максімальнае пакаранне за яго складае 40 гадоў турэмнага зняволення. Калегія прысяжных пачала раіцца ў панядзелак увечары, рашэнне яна вынесла ў аўторак днём.
Суддзя Пітэр Кэхіл зачытаў вердыкт, пасля чаго ўсе прысяжныя пацвердзілі, што згодны з ім. Як заявіў суддзя, "праз восем тыдняў з гэтага моманту будзе вынясенне прыгавору". Пітэр Кэхіл растлумачыў, што суд удакладніць даты пазней.
Дэрэк Шовін прысутнічаў на пасяджэнні. Ён адрэагаваў на вынясенне вердыкту спакойна. Да вынясення прыгавору ён застанецца пад вартай.
Рэзанансны разбор пачаўся 8 сакавіка. Дэрэк Шовін 25 мая мінулага года прымяніў пры затрыманні Джорджа Флойда ўдушлівы прыём. Афраамерыканец памёр у хуткім часе пасля гэтага. 26 мая Дэрэка Шовіна і яшчэ трох праваахоўнікаў, якія ўдзельнічалі ў арышце Джорджа Флойда, звольнілі.
Пасля смерці Джорджа Флойда ў ЗША прайшлі масавыя пратэсты і беспарадкі. Для ўсталявання спакою да мясцовых праваахоўных органаў падключалася Нацыянальная гвардыя ЗША. Прыкладна ў 40 гарадах, у тым ліку Вашынгтон і Нью-Ёрк, уводзілася каменданцкая гадзіна.-0-
