Дзярждума РФ ратыфікавала пагадненне з Беларуссю аб абмене інфармацыяй у сферы нагляду за фінрынкам

9 красавіка, Масква /Эдуард Півавар - БЕЛТА/. Дзярждума Расіі ратыфікавала беларуска-расійскае пагадненне аб супрацоўніцтве і абмене інфармацыяй, у тым ліку канфідэнцыяльнай, у сферы нагляду і (або) кантролю за фінансавым рынкам, перадае карэспандэнт БЕЛТА.

Гэта пагадненне было заключана паміж урадамі дзвюх краін, а таксама Нацыянальным банкам Беларусі і Цэнтральным банкам Расіі. Дакумент распрацаваны фінансавымі рэгулятарамі ў мэтах выканання саюзнай праграмы па гарманізацыі норм рэгулявання крэдытных і некрэдытных фінансавых арганізацый, а таксама фінансавага рынку ў цэлым, уключаючы забеспячэнне стварэння адзіных прынцыпаў страхавання ўкладаў. Мэта пагаднення - умацаванне надзейнасці і забеспячэнне стабільнасці фінансавых рынкаў Беларусі і РФ.

Пры ратыфікацыі дакумента адзначалася, што прадметам пагаднення з'яўляюцца адносіны, якія ўзнікаюць у рамках узаемадзеяння паміж нагляднымі органамі бакоў пры ажыццяўленні абмену інфармацыяй, у тым ліку канфідэнцыяльнай, атрыманай пры ажыццяўленні нагляду і (або) кантролю ў сферы фінансавых рынкаў, у тым ліку за дзейнасцю паднаглядных асоб, трансгранічных устаноў і бацькоўскіх (мацярынскіх) арганізацый. Пагадненне прадугледжвае правядзенне нагляднымі органамі сумесных праверак трансгранічных устаноў і арганізацый.-0-