11 сакавіка, Мінск /Кар. БЕЛТА/. Дзярждума РФ на сённяшнім пасяджэнні прыняла ў трэцім, заключным, чытанні законапраект аб папраўцы да Канстытуцыі, што прадугледжвае не больш за два прэзідэнцкія тэрміны, аднак дзеючы кіраўнік дзяржавы пасля ўступлення папраўкі ў сілу зможа балаціравацца на пасаду прэзідэнта зноў, паведамляе ТАСС.
Законам на ўзроўні Канстытуцыі РФ таксама замацоўваюцца абмежаванні для вышэйшых службовых асоб, пашыраюцца паўнамоцтвы парламента, устанаўліваюцца сацыяльныя гарантыі і прыярытэт нацыянальнага права над міжнароднымі пагадненнямі. У Канстытуцыю дабаўлена згадванне Бога і рускай мовы як мовы дзяржаваўтваральнага народа.
Закон прадугледжвае як унясенне змяненняў у Канстытуцыю, так і ў нарматыўныя акты, якія датычацца працэдуры іх уступлення ў сілу.
Цяпер закон павінен быць адобраны Саветам Федэрацыі, разгляд у верхняй палаце запланаваны на 11 сакавіка.-0-