15 кастрычніка, Мінск /Кар. БЕЛТА/. Сярод латвійскай моладзі назіраецца трывожная тэндэнцыя: амаль чвэрць маладых людзей хочуць пакінуць краіну, заявіў вядучы даследчык Інстытута філасофіі і сацыялогіі Латвійскага ўніверсітэта Марціньш Капранс, каменціруючы вынікі новага даследавання, паведамляе Delfi.
Летам 2021 года было праведзена міжнароднае апытанне ў дзевяці еўрапейскіх краінах, у выніку якога высветлілася, што многія маладыя жыхары Латвіі хочуць пераехаць. У апытанні прынялі ўдзел 4 тыс. чалавек з краін Балтыі, у тым ліку 1,2 тыс. маладых людзей з Латвіі.
ЗША, Германія і Іспанія - тры самыя папулярныя краіны, куды палічылі б за лепшае пераехаць маладыя грамадзяне Латвіі, Літвы і Эстоніі. "ЗША заўсёды былі адной з краін, якія прыцягвалі балтыйскіх мігрантаў. І не толькі таму, што ёсць магчымасці для работы, як можна было б падумаць. Але Злучаныя Штаты набылі імідж жаданай краіны дзякуючы сваёй раскошы, кіно і поп-культуры. Я думаю, што Германія ў многім звязана з рынкам працы. Вядома, Германія з яе зарплатамі, але і з рынкам працы. Яна ўваходзіць у топ-3 краін, дзе працуюць латвійцы", - растлумачыў Марціньш Капранс.
Між тым латвійская моладзь часцей за ўсё эмігруе ў Вялікабрытанію, Германію і Нідэрланды.
Паводле слоў Марціньша Капранса, 26 працэнтаў маладых латвійцаў не хацелі б пакідаць краіну ні пры якіх абставінах, у той час як 24 працэнты рэспандэнтаў вельмі моцна хочуць пераехаць з Латвіі.
Згодна з данымі Цэнтральнага статыстычнага ўпраўлення (ЦСУ) Латвіі, з 1990 па 2020 год агульная міграцыйная крывая ў Латвіі адмоўная: з краіны выязджае больш людзей, чым вяртаецца. Часцей за ўсё эмігруюць людзі ва ўзросце ад 20 да 39 гадоў.
Як паведаміла дырэктар Дэпартамента сацыяльнай статыстыкі ЦСУ Байба Зукула, у 2020 годзе ў Латвію на пастаяннае пражыванне прыехалі 8,8 тыс. чалавек, але каля 12 тыс. латвійцаў эмігравалі з краіны.-0-
