10 чэрвеня, Мінск /Кар. БЕЛТА/. Больш за 60 працэнтаў украінцаў лічаць, што падзеі ў іх краіне развіваюцца ў няправільным напрамку. Пры гэтым 55 працэнтаў называюць уладу прэзідэнта Уладзіміра Зяленскага непрафесійнай і дылетанцкай. Аб гэтым сведчаць вынікі сацыялагічнага даследавання цэнтра SOCIS, апублікаванага на яго афіцыйным сайце.
Даследаванне SOCIS праводзілася з 28 мая па 3 чэрвеня 2021 года. Усяго апытаны 2 тыс. чалавек, статыстычная хібнасць выбаркі - 2,4 працэнта.
На пытанне "Калі гаварыць у цэлым, як вы лічаце, падзеі ва Украіне развіваюцца ў правільным або няправільным напрамку?" 61,2 працэнта рэспандэнтаў адказалі, што ў няправільным, 21,1 працэнта - у правільным, 17,7 працэнта не змаглі адказаць.
Удзельнікі апытання таксама ацанілі, як змянілася іх матэрыяльнае становішча за апошнія два гады: 54,2 працэнта лічаць, што яно пагоршылася, 35,3 працэнта - не змянілася, 9,1 працэнта - палепшылася.
Калі б прэзідэнцкія выбары ва Украіне адбыліся на наступным тыдні, згодна з апытаннем, Уладзімір Зяленскі атрымаў бы 20,9 працэнта галасоў. Партыю "Слуга народа" на выбарах у Вярхоўную раду падтрымалі б 16 працэнтаў рэспандэнтаў.
На пытанне аб тым, хто нясе адказнасць за сацыяльна-эканамічную сітуацыю ва Украіне, 29,5 працэнта апытаных адказалі, што ўрад, яшчэ 29,2 працэнта - прэзідэнт Уладзімір Зяленскі, 21,3 працэнта - Вярхоўная рада.
Згодна з апытаннем, 50,1 працэнта ўкраінцаў лічаць, што Уладзімір Зяленскі не выканаў свае асноўныя абяцанні за два гады дзейнасці на пасадзе прэзідэнта. 33,2 працэнта апытаных лічаць, што некаторыя абяцанні прэзідэнт усё ж выканаў. У прыватнасці, перад выбарамі ў 2019 годзе Уладзімір Зяленскі паабяцаў пакласці канец эпосе беднасці. 66,5 працэнта рэспандэнтаў лічаць, што гэта абяцанне цалкам правалена, 25,3 працэнта - выканана часткова, 1,2 працэнта - поўнасцю рэалізавана.
На пытанне "Як бы вы ацанілі ў цэлым цяперашнюю ўладу прэзідэнта Зяленскага?" 55,3 працэнта ўдзельнікаў апытання адказалі, што цяперашняя ўлада непрафесійная і дылетанцкая, 15 працэнтаў - папулісцкая, 12,9 працэнта - кампетэнтная.
Рэспандэнты таксама ацанілі ініцыятыву Уладзіміра Зяленскага правесці дэалігархізацыю ва Украіне. 35,7 працэнта апытаных лічаць, што гэта папулісцкі крок, мэта якога - павысіць рэйтынг цяперашняй улады насельніцтва. Між тым 20,1 працэнта рэспандэнтаў бачаць у гэтым шчырае імкненне да справядлівасці. 12,9 працэнта ўдзельнікаў апытання бачаць у гэтай ініцыятыве спробы Уладзіміра Зяленскага і яго акружэння падзяліць уласнасць і самім стаць алігархамі.-0-
