28 снежня, Мінск /Кар. БЕЛТА/. Больш за 2,5 тыс. мігрантаў загінулі або прапалі без вестак у Міжземным моры і на марскім шляху на паўночны захад ад Афрыкі за першыя 11 месяцаў бягучага года пры спробе дабрацца да еўрапейскіх краін. Аб гэтым заявілі ва Упраўленні вярхоўнага камісара ААН па справах бежанцаў (УВКБ), паведамляе ТАСС.
"Паводле ацэнак УВКБ, са студзеня па канец лістапада больш за 2,5 тыс. чалавек загінулі або прапалі без вестак пры спробе дасягнуць Еўропы па Міжземным моры, а таксама на марскім шляху на паўночны захад ад Афрыкі", - адзначылі ва ўпраўленні.
У распаўсюджаным у Жэневе паведамленні УВКБ заявіла, што "глыбока засмучана" гібеллю людзей у выніку трох караблекрушэнняў, якія адбыліся з 21 па 24 снежня ў Эгейскім моры. Загінуў увогуле 31 чалавек. Прадстаўнік УВКБ у Грэцыі Марыя-Клара Марцін заклікала сусветную супольнасць да больш рашучых дзеянняў у барацьбе з кантрабандыстамі, якія перапраўляюць мігрантаў у Еўропу. Паводле яе слоў, трэба "спыніць тых, хто эксплуатуе галечу і адчай людзей".-0-
